Дэпутат Дзярждумы: У Расеі цяпер абстаноўка масавага псіхозу

Апазіцыйны дэпутат Дзярждумы РФ Ілля Панамароў мяркуе, што прапаганда стварае ў Расеі атмасферу масавага псіхозу.

Пра гэта Ілля Панамароў распавёў у інтэрв'ю "Главкому".

"У Расеі цяпер абстаноўка масавага псіхозу. Гэта, мяркуючы з кніг, вельмі нагадвае становішча ў Нямеччыне 1933. Людзі знаходзяцца ў палоне нейкай ідэі, і ім вельмі камфортна быць у палоне гэтай ідэі. Таму што яна здымае адказнасць за тое, як жыць", - распавёў палітык.

"Наогул, галоўная думка расейскай прапаганды, якая транслюецца ўвесь час на ўсю краіну, заключаецца ў тым, што мы не з Украінай ваюем, не з украінцамі. Ніхто нікуды не ўрываецца; наогул Украіна як краіна - несамастойнае непаразуменне. Затое ў нас ёсць супрацьстаянне з Амерыкай, якая спрабуе заняволіць братэрскі для нас украінскі народ. А мы, адпаведна, павінны прыкладаць усе намаганні для таго, каб амерыканцаў, немцаў, і іх "фашысцкую хунту" скінуць і выгнаць з тэрыторыі роднаснай нам краіны. Так гэта выглядае для шараговага расейца", - растлумачыў Панамароў.

Палітык нагадаў, што ўкраінцы - другая па велічыні нацыя, якая насяляе Расейскую Федэрацыю.

"Людзей, якія сябе ідэнтыфікуюць як украінцы, парадку 16%. Гэта азначае, што, як мінімум, палова з тых людзей, якія ідэнтыфікуюць сябе як этнічныя ўкраінцы, падтрымліваюць агрэсію на ўсходзе сваёй гістарычнай радзімы! Прычына ў тым, што вельмі дыскамфортна сказаць сабе : "мы - агрэсары". Псіхалагічна немагчыма прызнаць, што гэта мы падтрымліваем фашыстаў, праліваем кроў, з'яўляемся крыніцай гвалту. Значна камфортней казаць: не, мы - міратворцы, проста нас не разумеюць. Бо калі прызнаць, што мы - дрэнныя, то трэба неадкладна бунтаваць, браць зброю, ісці скідваць гэтую ўладу!" - падкрэсліў ён.

"На гэты момант расейцы не гатовыя чуць тую частку грамадства, якая выступае супраць вайны. Яны схільныя пераварочваць лозунгі антываеннага маршу ў лозунгі падтрымкі Украіны, што, увогуле, не зусім так. Мы, вядома, вельмі хочам, каб у вас быў поспех. Але мы, перш за ўсё, хочам, каб спынілася пралівацца кроў, каб у нас у Расеі пачаліся рэформы", - адзначыў Панамароў.