Праезд у Менску падаражэе да 9300 рублёў?

«Менсктранс» не выключае такога варыянту развіцця падзей.

У інтэрнэце з'явілася інфармацыя пра падаражанне праезду ў Менску да 9300. «Менсктранс» не выключае такога варыянту развіцця падзей.

Сёння ўночы ў папулярным пабліку «Падслухана. Менск» у сацсетцы «Вконтакте» з'явіўся запіс, у якім гаворыцца, што ў ліпені кошты праезду ў Менску вырастуць да 9300 рублёў. Чуткі або будучая рэальнасць? Правілы пабліка дазваляюць пакінуць на сцяне ўсялякі «сакрэт», праверыць дакладнасць якога немагчыма. Большасць запісаў зводзяцца да несур'ёзных выказванняў на тэму стасункаў паміж мужчынамі і жанчынамі. І раптам - важная эканамічная навіна. Onliner.by праверыў інфармацыю ў афіцыйных асоб.

«Гэта не «ўкід» і не дэзінфармацыя. Працую ў Белтэлерадыёкампаніі. На тэлеканал прыйшла навіна ад «Менсктрансу» з нагоды падвышэння коштаў праезду. З ліпеня гэтага года праезд будзе каштаваць 9300 бел. рублёў. У паведамленні сказана, што гэта звязана з каласальнымі выдаткамі дзяржавы на транспарт, маўляў, цяперашні кошт праезду ўдвая меншы за рэальныя выдаткі на яго, і тарыфы на праезд у грамадскім транспарце прыраўняюць да даляра па еўрапейскай сістэме. Афіцыйна гэтую навіну абвесцяць па тэлевізіі ўжо ў сярэдзіне сакавіка», - кажа запіс у пабліку.

- Ці сапраўды ў ліпені кошты праезду паднімуцца да 9300 рублёў? - З такім пытаннем журналісты звярнуліся ў дзяржаўнае прадпрыемства «Менсктранс».

Там зададзенаму пытанню, здаецца, не здзівіліся. І ўсё ж ад афіцыйнага каментара адмовіліся, коратка растлумачыўшы:

- Гэтая пастанова знаходзіцца, скажам так, «у стадыі размоў». Адны кажуць, што падаражанне адбудзецца ледзь не ў сакавіку, іншыя мяркуюць, што ў гэтым годзе не час для такіх новаўвядзенняў.

Нагадаем, апошні раз праезд у грамадскім транспарце даражэў у снежні 2014 гады - з 4000 да 4500 рублёў. Чарговае падвышэнне коштаў чыноўнікі планавалі на красавік, аднак яно не павінна было быць такім значным. Квіткі ў Менску павінны былі дадаць у кошце 500 рублёў і прадавацца па 5000 за штуку.