Завод «Белшыны» спыніў працу

У Бабруйску Завод масавых шын прыпыніў працу яшчэ 26 сакавіка.

Пра гэта паведаміў старшыня першаснай прафсаюзнай арганізацыі БНП ААТ «Белшына» Артур Міхалап, піша belnp.org.

- Завод спынілі цалкам, прычына мне невядомая, але думаю такая ж, як і на большасці прадпрыемстваў - адсутнасць рынку збыту. Склады заваленыя, - сказаў ён.

Паводле звестак Артура Міхалапа, завод спынены пакуль на пяць дзён - да 1 красавіка. Частка персаналу адправілі на працу ў падшэфныя гаспадаркі, а іншая частка знаходзіцца на 2/3, прыбіраюць тэрыторыю завода.

- Сітуацыя даволі сумная, - канстатаваў прафсаюзны лідар.

Раней паведамлялася, што некалі флагман айчынны машынабудаўнічы - Менскі аўтамабільны завод з 27 сакавіка цалкам спыніў галоўны канвеер. Прастой будзе доўжыцца да 6 красавіка.

Падобныя праблемы могуць закрануць усю машынабудаўнічую галіну.

У сваім лісце на імя прэм'ер-міністра Беларусі Андрэя Кабякова старшыня Беларускага кангрэсу дэмакратычных прафсаюзаў Аляксандр Ярашук заклікаў урад праявіць прафесіяналізм і высокую адказнасць, якія дазволяць пераадолець крызіс і закласці асновы новай эканамічнай палітыкі, здольнай прывесці Беларусь да росквіту, забяспечыць працоўным краіны годную працу і годную яе аплату.

- Сёння ўраду, на наш погляд, нельга сядзець і чакаць, што ўсё абыдзецца само сабой, што расейскі рынак, як было раней, зноў ажыве і будзе запатрабаваная прадукцыя нашых прадпрыемстваў, - гаворыцца ў лісце. - Нельга пускаць на самацёк і рабіць стыхійнымі, бескантрольнымі працэсы вызвалення рабочай сілы, скарачэння працоўных месцаў, што мы сёння назіраем. Варта неадкладна прыступіць да выпрацоўкі дзяржаўнай праграмы занятасці, перавучвання персаналу, праграмы стварэння новых працоўных месцаў.

На думку Ярашука, БКДП гатовы ўнесці ва ўрад свае прапановы, а таксама ўдзельнічаць у кансультацыях і абмеркаваннях крызіснай сітуацыі, якая стварылася, з выпрацоўкай захадаў у яе пераадоленні.

Нагадаем, зусім нядаўна Аляксандр Лукашэнка выказваў занепакоенасць сітуацыяй на прадпрыемствах Міністэрства прамысловасці. Як заявіў ён 6 сакавіка пры дакладзе міністра прамысловасці аб сітуацыі ў галінах, наяўных праблемах і шляхах іх развязання, з усіх галін, у якіх склалася неспрыяльная сітуацыя, яго больш за ўсё турбуе Мінпрам.

Прадпрыемствы гэтай установы, са слоў кіраўніка дзяржавы, займаюць пятую частку ўсёй прамысловай вытворчасці Беларусі, больш за палову прадукцыі накіроўваецца на экспарт. «Пры гэтым апошнім часам гэтыя прадпрыемствы сур'ёзна адстаюць і цягнуць уніз усю беларускую эканоміку», - канстатаваў ён.

Прэзідэнт нагадаў, што на мінулай нарадзе актуальных пытанняў сацыяльна-эканамічнага развіцця адбылася прынцыповая размова пра сучасныя тэндэнцыі развіцця эканомікі. «Мы дамаўляліся аб тым, што ўсякага роду кабінетную валакіту, залішнія ўзгадненні мы выключым, будзем прымаць неабходныя пастановы і забяспечваць іх выкананне», - нагадаў ён.

«Развагі пра тое, як цяжка і што вы будзеце рабіць паслязаўтра, тут абсалютна не патрэбныя. Мне патрэбны канкрэтны вынік», - падкрэсліў Аляксандр Лукашэнка.

Падчас сваіх візітаў на прамысловыя прадпрыемствы сталіцы, прэм'ер-міністр Беларусі Андрэй Кабякоў заявіў, што «праблемы ў прамысловай вытворчасці адбіваюцца на росце айчыннай эканомікі».

Ён падкрэсліў: каб быць канкурэнтаздольнымі і выпускаць запатрабаваную на замежных рынках прадукцыю, прадпрыемствы павінны працаваць па-іншаму, адмаўляцца ад старых метадаў. У прыватнасці, ад прынцыпу: «Заплаціце грошы і самі забярыце прадукцыю». «Ад гэтага трэба сыходзіць, - падкрэсліў прэм'ер-міністр. - Трэба ісці прапаноўваць сваю прадукцыю. Паглядзець, што людзям трэба, і зрабіць гэта».

Фота: bobruisk.ru