Гаажскі трыбунал адклікаў пастанову аб вызваленні Ваіслава Шэшаля
- 30.03.2015, 16:49
- 5,650
Паплечнік Мілошавіча парушыў умовы свайго вызвалення.
Гаажскі трыбунал адклікаў сваю пастанову аб вызваленні лідара Сербскай радыкальнай партыі Ваіслава Шэшаля. Пра гэта паведамляе Lenta.ru са спасылкай на Reuters.
Як гаворыцца ў заяве Міжнароднага трыбунала аб былой Югаславіі (МТБЮ), Шэшаль парушыў умовы свайго вызвалення. Прынамсі, Шэшалю прадпісвалася прыбыць у Гаагу па першым выкліку, аднак сербскі палітык неаднаразова заяўляў, што рабіць гэтага не мае намеру.
Даведаўшыся аб скасаванні пастановы МТБЮ, Шэшаль заявіў, што добраахвотна ў камеру не вернецца і будзе адстойваць свае пазіцыі ў сербскім судзе. «Хай паліцыя прыходзіць і паспрабуе мяне арыштаваць, гарантую, гэта будзе нялёгкай справай», - сказаў ён.
Шэшаль, у якога дыягнаставалі рак, быў часова вызвалены з-пад варты ў лістападзе 2014 года. Пастанова была прынятая «з гуманных меркаванняў»: яму дазволілі звярнуцца па медыцынскую дапамогу ў Сербіі пры ўмове, што ён не будзе ціснуць на пацярпелых або сведак паводле ягонай справы і вернецца ў суд, калі яго выкліча суддзя.
Шэшаль знаходзіцца пад вартай у Гаазе з 2003 года, працэс паводле ягонай справы быў пачаты ў 2007 годзе. Ён паўстаў перад МТБЮ добраахвотна. Палітыка абвінавачваюць ва ўчыненні ваенных злачынстваў у 1991-1994 гадах, а менавіта ў падбухторванні да гвалту супраць не сербскага насельніцтва былой Югаславіі, распальванні нацыянальнай варожасці, а таксама датычнасці да катаванняў і забойстваў. Пракуратура патрабуе для яго 28 гадоў турмы. Шэшаль выстаўленыя супраць яго абвінавачванні адмаўляе.