Прынц Уільям будзе працаваць пілотам гелікоптэра хуткай дапамогі

Брытанскі прынц Уільям прыступіў да працы пілотам у кампаніі Bond Air Services, якая вядзе паслугі хуткай дапамогі.

Пра гэта паведамілі ў панядзелак у Кенсінгтонскім палацы - афіцыйнай рэзідэнцыі герцага і герцагіні Кембрыджскіх, паведамляе ТАСС.

«Прынц Уільям пачаў прафесійную дзейнасць у якасці супрацоўніка кампаніі Bond Air Services, - гаворыцца ў гэтай заяве. – Цягам найбліжэйшых месяцаў ён будзе праходзіць дадатковае навучанне перад тым, як пачаць самастойныя палёты ў якасці пілота паветранай хуткай дапамогі ва Усходняй Англіі».

Паведамляецца, што абавязковая падрыхтоўка ўключае ў сябе працу на лётным трэнажоры, а таксама палёты сумесна з інструктарам. У канцы лютага Уільям завяршыў паўгадавое навучанне, каб стаць ліцэнзаваным пілотам гелікоптэра хуткай дапамогі, для чаго прынцу спатрэбілася здаць 14 іспытаў. Тым не менш, згодна з існуючым правілам, да таго, як прыступіць да непасрэднай прафесійнай дзейнасці, прынцу трэба прайсці дадатковае навучанне ў свайго цяперашняга працадаўцы.

Паветраная хуткая дапамога ва Усходняй Англіі сем дзён у тыдзень забяспечвае дзяжурства двух гелікоптэраў Eurocopter EC135. Гэтыя машыны кіруюцца адным пілотам, аднак ўважаецца, што Уільям будзе лётаць на новай мадэлі EC145, дзе пілотаў - двое. Яны працуюць пяць дзён па 10 гадзін за змену, а затым адпачываюць цягам трох дзён. Спачатку прынц павінен стаць другім пілотам, але ў перспектыве можа заняць пасаду камандзіра паветранага судна.

У год гелікоптары гэтай медыцынскай службы здзяйсняюць больш за 1,5 тыс. вылетаў на выклікі, звязаныя з разнастайнымі здарэннямі - ад аўтамабільных аварый да сардэчных прыступаў.