Курс еўра ўпаў на фоне заяў прэм'ера Грэцыі аб знешняй запазычанасці

Курс еўра да амерыканскай валюты апускаўся да 1,0792 даляры.

Курс еўра зніжаецца ў дачыненні да даляра на гандлёвай сесіі 31 сакавіка пасля заяваў прэм'ер-міністра Грэцыі Алексіса Цыпраса з нагоды перамоваў аб рэструктурызацыі замежнай запазычанасці, што прагучалі напярэдадні ў грэцкім парламенце, паведамляе РІА «Новости».

Паводле стану на 07:45 курс еўра да амерыканскай валюты апускаўся да 1,0792 даляра супраць 1,0833 даляра за еўра на закрыцці папярэдняй сесіі. Індэкс даляра (курс даляра да кошыку шасці валют краін - асноўных гандлёвых партнёраў ЗША) узрос на 0,23% - да 98,18 пункта.

Напярэдадні, 30 сакавіка, увечары Цыпрас у парламенце Грэцыі заявіў, што Афіны да чэрвеня разлічваюць пачаць перамовы аб рэструктурызацыі замежнай запазычанасці, якая перавысіла 324 млрд. еўраў або 180 адсоткаў УБП гэтай краіны. Пры гэтым палітык падкрэсліў, што «адкрытыя і жорсткія перамовы» будуць ісці да канца. Цыпрас таксама заклікаў апазіцыянераў падтрымаць пазіцыю грэцкага ўрада, які вымагае ад крэдытораў спісання большай часткі запазычанасцяў.

«Мы маем намер прыйсці з партнёрамі да чэрвеня да новай дамовы развіцця, каб паменшыць у наступныя тры гады вялізны прафіцыт, які з'яўляецца сінонімам палітыкі вельмі жорсткай эканоміі», - адзначыў Цыпрас.

28 сакавіка Міжнароднае рэйтынгавае агенцтва Fitch панізіла доўгатэрміновы рэйтынг дэфолту эмітэнта Грэцыі з «B» да «CCC», спасылаючыся на адсутнасць цяпер доступу на рынкі запазычанняў для грэцкага ўрада і праблемы з ліквіднасцю ў банкаўскім сектары краіны, піша Lenta.ru.

У лютым Еўрагрупа ўхваліла план рэформаў у Грэцыі і падоўжыла праграму фінансавай падтрымкі краіны да чэрвеня 2015 года.

У той жа час сфармаваны левай партыяй СІРЫЗА новы ўрад адмоўна ставіцца да неабходнасці выканання рэжыму эканоміі, які з'яўляецца ўмовай фінансавай падтрымкі з боку міжнародных крэдытораў. Еўрапейскі Цэнтрабанк раней заяўляў, што не будзе браць удзелу ў спісанні або рэструктурызацыі запазычанасці Грэцыі.