Мінфін Беларусі не бачыць магчымасці для зніжэння стаўкі ПДВ
10- 31.03.2015, 14:19
- 10,985
Падставы для зніжэння стаўкі падатку на даданую вартасць у краіне адсутнічаюць, мяркуе намеснік міністра фінансаў Дзмітрый Кійко.
Нагадаем, стаўка падатку на даданую вартасць у Беларусі значна вышэйшая (20%), чым у іншых краінах Еўразійскага эканамічнага саюза, паведамляе БелаПАН.
У Расеі стаўка ПДВ складае 18%, у Казахстане - 12%. Беларускія бізнэс-саюзы для стварэння роўных умоў гаспадарання ў еўразійскім саюзе прапаноўвалі знізіць стаўку ПДВ у краіне.
«Сапраўды, стаўка падатку на даданую вартасць у Расеі і Казахстане прыкметна меншая. Але наяўная розніца абумоўленая аб'ектыўнымі прычынамі - наяўнасцю ў нашых партнёраў нафтагазавых даходаў», - гаворыцца ў публікацыі намесніка міністра фінансаў Дзмітрыя Кійко, якая размешчаная ў апошнім нумары часопіса «Фінансы, улік, аўдыт», што выдаецца Мінфінам.
Намеснік міністра звярнуў увагу, што ў Расеі на нафтагазавыя даходы прыпадае каля 10,5% ВУП, у Казахстане - 12,3% ВУП.
«У Беларусі паказчыкі аб'ектыўна ніжэйшыя. У нас на нафтагазавыя даходы ў 2014 годзе прыйшлося 1,3% ВУП. У 2015 годзе чаканні павялічаныя да 4,3% ВУП, але прагноз будуецца ўжо з улікам залічэння вывазных падаткаў на нафтапрадукты ў наш бюджэт», - адзначае Кійко.
Ён звярнуў увагу, што для Беларусі ПДВ з'яўляецца «асноўнай крыніцай папаўнення казны», на долю якога прыпадае больш за 37% усіх даходаў бюджэту, а ў Расеі за кошт ПДВ фармуецца каля 20% даходаў, у Казахстане - каля 14%.
«З улікам наяўнай эканамічнай сітуацыі, сярод іншага абумоўленай вонкавымі фактарамі, рэзервы для зніжэння ставак асноўных падаткаў (у тым ліку ПДВ) сёння адсутнічаюць», - падкрэсліў Кійко.
У студзені-лютым 2015 года, паводле інфармацыі БелаПАН, ад падатку на даданую вартасць у рэспубліканскі бюджэт паступіла 9,4 трлн рублёў, на ПДВ прыйшлося амаль 39% сукупных даходаў бюджэту.