Беларуская нафтавая кампанія адкрывае АЗС у Расеі

Даччыная структура Беларускай нафтавай кампаніі ў Расеі ў сакавіку адкрые дзве першыя АЗС пад брэндам Beloil.

Яны будуць размяшчацца ў Смаленскай вобласці, дзе знаходзіцца офіс «дочкі» БНК «Еўрапейскай трэйдынгавай кампаніі», піша БелТА.

Дырэктар ЕТК Сяргей Сакалоўскі ўдакладніў, што «запраўкі знаходзяцца ва ўласнасці адной з буйных расейскіх нафтатрэйдынгавых кампаній». «А ЕТК дае свой брэнд і тавар», - сказаў ён. Пасля адкрыцця заправак аўтамабілісты змогуць набываць бензін АІ-92 і АІ-95 беларускай вытворчасці.

Сакалоўскі звярнуў увагу, што кампанія робіць першы крок у развіцці напрамку раздробленага гандлю. «У перспектыве мы плануем адкрыццё іншых брэндавых АЗС. Калі будзе эканамічна мэтазгодна, у будучыні разгледзім магчымасць будаўніцтва ўласных аўтазаправачных комплексаў», - падзяліўся планамі дырэктар ЕТК.

«Еўрапейская трэйдынгавая кампанія» была створаная ў 2012 годзе. Адным з прыярытэтных напрамкаў дзейнасці кампаніі з'яўляецца выкананне беларуска-расейскіх міжурадавых дамоўленасцяў, у якіх агавораныя ўмовы і аб'ёмы паставак нафтапрадуктаў беларускіх НПЗ для забеспячэння патрэбаў унутранага рынку Расеі. ЕТК з'яўляецца адным з найбуйнейшых падаткаплацельшчыкаў Смаленскай вобласці, з пачатку сваёй дзейнасці паставіла ў Расею больш за 1 млн. т. нафтапрадуктаў.

«Беларуская нафтавая кампанія» створаная ў 2007 г. для аптымізацыі работы ў закупках нафты і экспарту нафтапрадуктаў. Яе асноўнымі акцыянерамі з'яўляюцца «Беларуснафта», «Нафтан» і «Мазырскі НПЗ».

Раней БНК доўгі час выношвала планы ў стварэнні сеткі раздробленага гандлю ва Украіне, дзе пастаўкі з Беларусі займаюць блізу 50% у балансе паліўнага рынку.