Банкі шукаюць у Беларусі «палітычна значных» кліентаў

Трымальнікаў электронных гаманцоў у «Белгазпрамбанку» прымушаюць адзначаць у анкеце, ці з'яўляюцца яны «палітычна значнымі асобамі».

Пра гэта «Беларускаму партызану» паведаміў адзін з нашых чытачоў.

У самім банку заявілі, што выяўляць «палітычна значных асобаў» абавязкі ўсіх беларускіх банкаў.

«У анкеце няма і не магло быць пытанняў, якія тычацца палітычных поглядаў кліента. У анкеце пытаюцца ці з'яўляецеся Вы палітычна важнай асобай. Банкі павінны задаваць такое пытанне кліентам для таго, каб выканаць патрабаванні заканадаўства Рэспублікі Беларусь», - паведамілі ў банку.

Так, у адпаведнасці з Законам Рэспублікі Беларусь ад 19 ліпеня 2000 № 426-З «Аб захадах у прадухіленні легалізацыі даходаў, атрыманых злачынным шляхам, і фінансавання тэрарыстычнай дзейнасці», банкі абавязаныя выяўляць з ліку кліентаў палітычна значных асоб.

Згодна з законам, палітычна значныя асобы - фізічныя асобы, якія надзеленыя (ці былі надзеленыя) значнымі публічнымі функцыямі ў замежнай дзяржаве, напрыклад кіраўніка дзяржавы або ўрада, буйныя палітычныя дзеячы, вышэйшыя ўрадавыя чыноўнікі, судовыя або вайсковыя чыноўнікі, кіраўнікі дзяржаўных карпарацый, прадстаўнікі важных палітычных партый і г.д.

Калі б кліент выявіўся палітычна важнай асобай, то паводле закону банк абавязаны: «укладаць дамовы на правядзенне фінансавых аперацый у пісьмовай форме з палітычна важнымі асобамі, а таксама арганізацыямі, бенефіцыярнымі ўладальнікамі якіх яны з'яўляюцца, толькі пасля атрымання пісьмовага дазволу кіраўніка (упаўнаважанай ім асобы) асобы, якая праводзіць фінансавыя аперацыі, а калі ўдзельнік фінансавай аперацыі стаў палітычна важнай асобай, а таксама арганізацыяй, бенефіцыярным уладальнікам якой яна з'яўляецца, пасля ўкладання з ім дамовы на правядзенне фінансавых аперацый у пісьмовай форме, - атрымаць пісьмовы дазвол адпаведнага кіраўніка (упаўнаважанай ім асобы) на працяг гэтай дамовы; ужываць абгрунтаваныя і даступныя ў абставінах, якія склаліся, захады вызначэння крыніц паходжання сродкаў палітычна важных асобаў, а таксама арганізацый, бенефіцыярнымі ўладальнікамі якіх яны з'яўляюцца».