У Беларусь да канца тыдня вернецца снег

Надвор'е ў Беларусі на гэтым тыдні будзе няўстойлівым.

Пра гэта карэспандэнту БелТА паведаміў начальнік службы гідраметэаралагічных прагнозаў Рэспубліканскага цэнтра гідраметэаралогіі, кантролю радыеактыўнага забруджвання і маніторынгу навакольнага асяроддзя Дзмітрый Рабаў.

"У першай палове тыдня ў большасці раёнаў захаваецца цёплае надвор'е з сярэдняй тэмпературай паветра вышэй за норму на 6-10 градусаў. У другой палове тыдня чакаецца больш прахалоднае і сырое надвор'е, тэмпература паветра крыху панізіцца", - сказаў ён.

Пераважна без ападкаў будзе ў аўторак. Уночы і раніцай у асобных раёнах згусціцца слабы туман. Тэмпература паветра ўначы складзе ад мінус 1 да плюс 4 градусаў, удзень прагназуецца плюс 6-12, на поўдні месцамі да плюс 15.

У сераду з боку Балтыйскага мора перамесціцца малаактыўны атмасферны фронт і прынясе ўночы ў паўночна-заходнія, удзень і ў некаторыя цэнтральныя раёны кароткачасовыя дажджы. Уночы і ранкам у асобных раёнах будзе адзначацца слабы туман. Тэмпература паветра ўначы складзе ад нуля да плюс 5, удзень - ад 5 да 11 вышэй за нуль, на паўднёвым усходзе месцамі да плюс 13.

"Пачынаючы з чацвярга ў атмасферы адбудзецца пераўтварэнне і да нас пачнуць паступаць больш свежыя і вільготныя паветраныя масы з Чорнага мора: уночы месцамі, удзень пераважна на паўднёвым усходзе краіны кароткачасовыя ападкі ў выглядзе дажджу, мокрага снегу", - адзначыў Дзмітрый Рабаў. Уначы тэмпература паветра складзе ад мінус 1 да плюс 5 градусаў, удзень - ад 2 да 8 цяпла, на ўсходзе месцамі да плюс 10.

Як звярнуў увагу спецыяліст, самыя непагодлівыя дні чакаюцца ў чацвер і пятніцу, вінаваты ў гэтым будзе актыўны атмасферны фронт, які прыйдзе з паўднёвага ўсходу. Ён прынясе ападкі - дождж і мокры снег. Уночы і раніцай месцамі прагназуецца слабы галалёд. Тэмпература паветра ўначы складзе ад мінус 1 да плюс 4, удзень - ад 1 да 8 цяпла.

У нядзелю, з ростам атмасфернага ціску, надвор'е пачне паляпшацца, ападкі на большай частцы спыняцца і чакаюцца толькі месцамі ў выглядзе дажджу і мокрага снегу. Уночы і раніцай месцамі ўтворыцца слабы галалёд. Тэмпература паветра ўначы складзе ад мінус 3 да плюс 3, удзень - ад 1 да 7 цяпла.