Пад Талачыном забіты супрацоўнік Дзяржінспекцыі аховы жывёльнага і расліннага свету

Следчы камітэт расследуе справу аб забойстве супрацоўніка Дзяржаўнай інспекцыі аховы жывёльнага і расліннага свету.

«Следствам устаноўлена, што раніцай 11 красавіка супрацоўнікі Аршанскай міжраённай інспекцыі аховы жывёльнага і расліннага свету пры прэзідэнце Рэспублікі Беларусь падчас правядзення планавага рэйд-маршруту ляснога масіву паблізу вёскі Петрашы Талачынскага раёна Віцебскай вобласці, атрымалі звесткі пра факт браканьерства на тэрыторыі ўчастка, які абслугоўвалі, - паведамілі ў камітэце. - Правяраючы паступіўшую інфармацыю, адзін з супрацоўнікаў інспекцыі ў паказаным месцы выявіў чалавека са зброяй. Ён паспрабаваў наблізіцца да мужчыны, каб праверыць дакументы, аднак апошні зрабіў стрэл у інспектара і схаваўся. Ад атрыманага агнястрэльнага ранення супрацоўнік памёр на месцы», - гаворыцца ў паведамленні прэс-службы Следчага камітэта.

Напарнік загінулага неадкладна паведаміў аб тым, што адбылося, у праваахоўныя органы і апісаў прыкметы чалавека, які страляў. Яго аператыўна затрымалі супрацоўнікі міліцыі. Ім выявіўся 55-гадовы жыхар Талачына.

У дачыненні да затрыманага Следчым камітэтам распачатая крымінальная справа паводле п.10 ч.2 арт.139 (забойства асобы ў сувязі з выкананнем ім службовай дзейнасці) Крымінальнага кодэкса Рэспублікі Беларусь. Цяпер з падазраваным працуюць следчыя.

Першапачатковыя следчыя дзеянні праводзіліся з прымяненнем магчымасцей перасоўнай крыміналістычнай лабараторыі. На месцы здарэння працавалі следчыя цэнтральнага апарата Следчага камітэта, управы Следчага камітэта Віцебскай вобласці, спецыялісты Дзяржаўнага камітэта судовых экспэртыз. Падчас агляду прылеглай мясцовасці выяўленая паляўнічая стрэльба, патроны да гладкаствольнай зброі і стрэляная гільза.

Працу на месцы здарэння каардынаваў начальнік управы Следчага камітэта Віцебскай вобласці Уладзімір Шалухін.

Паводле пастановы кіраўніцтва Следчага камітэта для арганізацыі далейшага расследавання крымінальная справа перададзеная ў Галоўную следчую ўправу.