Першы «Як-130» прыбыў у Беларусь
4- 15.04.2015, 11:23
- 11,864
15 красавіка на аэрадром Ліды прыбыў першы вучэбна-баявы самалёт Як-130, які паступіць на ўзбраенне ВПС і войскаў СПА.
Пастаўка гэтых самалётаў пашырыць магчымасці ў падрыхтоўцы лётнага складу для эксплуатацыі аж да перспектыўных самалётаў пятага пакалення, гаворыцца ў паведамленні Міністэрства абароны.
Як-130 у Беларусь пастаўляе «Навуковая-вытворчая карпарацыя «Іркут» у рамках рэалізацыі Дамовы паміж Расейскай Федэрацыяй і Рэспублікай Беларусь аб развіцці вайскова-тэхнічнага супрацоўніцтва.
Цяпер група вайскоўцаў прадаўжае навучанне выканання палётаў і тэхнічнай эксплуатацыі гэтага самалёта на базе Цэнтра арганізацыі падрыхтоўкі авіяцыйнага персаналу ў горадзе Жукоўскі Расейскай Федэрацыі.
Двухмесны вучэбна-баявы самалёт Як-130, распрацаваны ОКБ ім. А.С.Якаўлева, прызначаны для асноўнай і падвышанай падрыхтоўкі лётчыкаў франтавой авіяцыі. Самалёт адрозніваецца выдатнай манеўранасцю і сучасным бартавым радыёэлектронным абсталяваннем, характэрным для найноўшых баявых самалётаў, а таксама высокай надзейнасцю і доўгім рэсурсам.
Як-130 з'яўляецца адзіным у свеце навучальным самалётам з аэрадынамічнай кампаноўкай і лётна-тэхнічнымі характарыстыкамі дагукавога палёту, аналагічнымі сучаснаму рэактыўнаму знішчальніку. Самалёт здольны несці да 3000 кг баявой нагрузкі (кіраванае і некіравальнае ракетнае і бомбавае ўзбраенне, гарматы і г.д.) на дзевяці вонкавых вузлах падвескі.