«Мэрсэдэс» вывеў на Нюрбургрінг новы гоначны суперкар
2- 15.04.2015, 18:01
- 6,962
Кампанія Mercedes-Benz выпрабоўвае гоначную версію суперкара AMG GT, прэзентаваную ў сакавіку на Жэнеўскім аўтасалоне.
Першы ролік, у якім паказаны заезд купэ на «Паўночнай пятлі» Нюрбургрінг, апублікавалі на YouTube.
Навінка абсталяваная ўдасканаленай 6,3-літровай атмасфернай «васьмёркай», звесткі аб аддачы якой пакуль не прыводзяцца. У былога гоначнага «Мерседэса» - SLS AMG GT3 - гэты агрэгат развіваў да 550 конскіх сіл. Інтэнсіўныя выпрабаванні суперкара працягнуцца да канца 2015 года, а ў 2016 годзе купэ дэбютуе ў чэмпіянаце FIA GT3, паведамляе motor.ru.
Немцы таксама плануюць распрацаваць дарожную версію на базе гоначнага аўтамабіля. Яе абсталюць новым чатырохлітровым цвін-турба рухавіком V8, які ўсталёўваецца на звычайны AMG GT. Мяркуецца, што для самага экстрэмальнага варыянту «цывільнага» суперкара гэты рухавік фарсіруюць з 510 да 550 конскіх сіл.
Дзякуючы дадатковаму выкарыстанню ў канструкцыі кампазітных матэрыялаў маса купэ знізіцца на 80-100 кілаграмаў - прыблізна да 1470 кілаграмаў. Чакаецца, што суперкар зможа набіраць першую «сотню» у 3,6 секунды, а яго максімальная хуткасць будзе абмежаваная 310 кіламетрамі ў гадзіну.