Фільм пра забітых апанентаў Лукашэнкі паказалі ў Вільні

У пасольстве Чэхіі ў Вільні прайшоў паказ дакументальнага фільма «Банда» пра зніклых беларускіх палітыкаў і журналістаў.

Арганізатарамі прагляду выступілі Беларускі дом правоў чалавека ў Вільні, Freedom House і пасольства Чэхіі ў Літве, піша ru.DELFI.lt.

Паглядзець фільм прыйшлі прадстаўнікі дыпкорпуса акрэдытаваных у Літве дзяржаў, прадстаўнікі беларускай абшчыны, праваабаронцы, журналісты. Першы паказ гэтага фільма прайшоў у свой час у Вашынгтоне. На мерапрыемстве таксама прысутнічала Вольга Завадская, мама зніклага аператара ОРТ Дзмітрыя Завадскага, аднаго з герояў фільма.

Дакументальны фільм быў паказаны ў Літве ўпершыню, прычым у пашыраным варыянце. Гледача знаёмяць з хронікай знікнення вядомых палітыкаў - апанентаў Аляксандра Лукашэнкі, а таксама з тым, як і хто займаўся іх фактычнай ліквідацыяй.

«Што гэта за фільм, і чаму мы яго зрабілі менавіта цяпер? 16 гадоў таму, 7 траўня, будзе роўная дата - знік першы палітычны апанент рэжыму Лукашэнкі Юрый Захаранка. З тых часоў зніклі яшчэ тры апаненты рэжыму, і крымінальныя справы фактычна знаходзяцца ў замарожаным стане. Ніхто не ведае пра лёсы гэтых зніклых людзей і ніхто не ведае, ці расследаваныя крымінальныя справы», - сказала Раіса Міхайлоўская - кіраўніца дакументацыйнага цэнтра, няўрадавай арганізацыі, якая знаходзіцца ў Беларусі і займаецца зборам юрыдычных доказаў парушэнняў правоў чалавека, учыненых падчас знаходжання ва ўладзе Аляксандра Лукашэнкі.

Дакументаліст нагадала, што з таго часу вырасла практычна новае пакаленне беларусаў, у дыпламатычных колах розных краін змяніліся дыпламаты. «Сярод іх ніхто не ведае (некаторыя, можа быць, ведаюць з чутак) падрабязнасці (знікнення апанентаў рэжыму)», - сказала яна.

І, са слоў Міхайлоўскай, гэты фільм патрэбен як сведчанне для будучай гісторыі, будучых крымінальных спраў.

«І гэта маральная падтрымка сваякоў зніклых. Наша задача як праваабаронцаў - захаваць гэтыя довады, - падкрэсліла аўтар фільма. - Акрамя таго, гэта памяць пра тых людзей. Гэта не проста чатыры зніклыя чалавекі. Гэта сапраўды эліта, палітычная эліта Беларусі, і гэтыя знікненні стварылі за сабой ланцужок незваротных наступстваў той сітуацыі, у якой Беларусь выявілася цяпер».