У Расеі згубіўся мэр Ёшкар-Алы

Супрацоўнікі паліцыі Ёшкар-Алы вядуць пошукі зніклага без вестак мэра Паўла Плотнікава.

Аб гэтым паведамляецца на сайце ўправы МУС Рэспублікі Марый Эл.

Уначы ў праваахоўныя органы звярнулася ягоная жонка, якая паведаміла аб знікненні мужа. Паводле яе слоў, 17 красавіка Плотнікаў прыехаў на вуліцу Будаўнікоў і дагэтуль ягонае месцазнаходжанне невядомае.

Прыкметы 38-гадовага мужчыну накіраваныя ва ўсе тэрытарыяльныя аддзелы паліцыі.

Як пазней паведаміў партал «Pro Горад Йошкар-Ола» са спасылкай на крыніцу, Плотнікаў знайшоўся ў суботу раніцай. «Супрацоўнікі паліцыі Заводскага раёна горада знайшлі мэра жывым», - паведаміла крыніца.

Тым часам РІА Новости ў прэс-службе рэгіянальнага МУС распавялі, што інфармацыя аб выяўленні кіраўніка горада не пацвердзілася.

Павел Плотнікаў быў прызначаны на пасаду мэра 31 кастрычніка 2014. У лютым таго ж года ў дачыненні да яго распачалі дзве крымінальныя справы аб перавышэнні і злоўжыванні службовымі паўнамоцтвамі. У снежні 2014 следства вынесла пастановы аб спыненні крымінальнага пераследу Плотнікава, аднак у лютым 2015-га пракуратура іх скасавала, прызнаўшы гэтыя працэсуальныя пастановы неабгрунтаванымі.