Пажар у цэнтры Лондана прадаўжаецца другі дзень (Відэа)
- 2.04.2015, 15:38
- 10,047
Лонданскія пажарныя другі дзень спрабуюць справіцца з узгараннем кабеляў, пракладзеных пад адной з цэнтральных вуліц сталіцы.
Пажар у падземных камунікацыях і электраправодцы пад вуліцай Кінгсуэй у цэнтральным лонданскім раёне Холбарн пачаўся ў сераду. Праз моцнае задымленне і небяспеку распаўсюджвання агню з бліжэйшых офісаў былі эвакуяваныя блізу 5 тысяч чалавек, у іх ліку - супрацоўнікі размешчанага непадалёк Высокага суда Лондана, дзе нядаўна праходзілі слуханні паводле справы аб атручэнні Аляксандра Літвіненкі, паведамляе BBC.
Боязь пажарных выклікае тое, што пад падпаленымі кабелямі знаходзяцца газавыя трубы.
У чацвер па-ранейшаму не працавалі найбліжэйшыя станцыі метро, а вуліца была перагароджаная для транспарту і пешаходаў.
Прадстаўнік Лонданскай пажарнай брыгады (LBF) паведаміў, што ў чацвер раніцай пажар быў лакалізаваны ў падземным тунэлі, але яшчэ не быў патушаны. З ягоных слоў, доступ да месца ўзгарання вельмі ўскладнены.
На месцы пажару па-ранейшаму знаходзяцца 35 пажарных і 6 пажарных машын. Прычына ўзгарання пакуль невядомая. Пажар сур'ёзна ўскладніў працу больш як ста кампаній, офісы якіх знаходзяцца ў гэтым раёне. Са слоў прадстаўніка пажарных Дэні Катон, такія ўзгаранні ў падземных камунікацыйных тунэлях надзвычай небяспечныя, асабліва калі там пралягаюць газавыя трубы, і тушэнне такіх пажараў уяўляе вялікія тэхнічныя складанасці.
Пажарныя запампоўваюць у тунэль ваду, каб прадухіліць распаўсюд агню. Тым часам прадстаўнік паліцыі паведаміў, што вуліца будзе перагароджаная яшчэ даволі доўга, і супрацоўнікі найбліжэйшых офісаў наўрад ці скора змогуць вярнуцца на працоўныя месцы.