Археолагі ўпершыню знайшлі ў Еўропе шкілет баявога вярблюда
- 2.04.2015, 16:13
- 8,960
Аўстрыйскія археолагі, якія вялі раскопкі на месцы будаўніцтва гандлёвага цэнтра ў горадзе Тульн, наткнуліся на першы цэлы шкілет вярблюда ў Цэнтральнай Еўропе.
Жывёліна трапіла ў краіну пасля аблогі Вены войскам Асманскай імперыі ў 1683 годзе. Імаверна, яе прадалі мясцовым жыхарам туркі, якія пакідалі тэрыторыю. Аб адкрыцці навукоўцы распавялі на старонках часопіса PLoS One, паведамляе Lenta.ru.
Косткі навукоўцы знайшлі ў склепе XVII стагоддзя сярод смецця, чарапкоў ад збаноў, талерак і патэльняў, прычым спачатку яны наважылі, што перад імі шкілет каня або каровы незвычайных прапорцый. Вярблюда апазналі па костках задніх ног.
Паводле звестак аналізу ДНК, ён нарадзіўся ад самкі драмадэра (аднагорбы вярблюд) і самца бактрыяна (двухгорбага вярблюда). Гэта быў гібрыд аднагорбага і двухгорбага вярблюда. Такія гібрыды карысталіся папулярнасцю ў асманскім войску за сваю паслухмянасць, цягавітасць і вялікі памер. Мяркуючы са стану зубоў і костак жывёліны, на ёй ездзілі, але не перавозілі паклажу. Такім чынам, гэта мог быць толькі баявы вярблюд.
Таксама навукоўцаў уразіла, што шкілет асманскай жывёліны знайшлі ў горадзе, які туркі аблажылі, але ўзяць не змаглі. Імаверна, пацярпелыя паразу воіны прадалі вярблюда мясцовым жыхарам, у якіх ён пражыў да старасці. Таму шкілет захаваўся ў недатыкальнасці - звычайна ў такім войску жывёлін з'ядалі.
Археолагі раней знаходзілі толькі асобныя косткі вярблюдаў у Еўропе - галоўным чынам эпохі Рымскай імперыі. Найбліжэйшы да еўрапейскіх краін поўны шкілет вярблюда (драмадэра) быў знойдзены ў Стамбуле.
Малюнак: Galik/plos.org