Старшыня Мінгарвыканкама прапануе ўвесці новы падатак

Сталічнай падатковай інспекцыі загадана наладзіць эфектыўную працу напаўнення бюджэту за кошт унутраных рэсурсаў.

Пра гэта, як перадае карэспандэнт агенцтва «Минск-Новости», заявіў старшыня Мінгарвыканкама Андрэй Шорац на калегіі інспекцыі Міністэрства падаткаў і збораў г. Мінска, дзе былі разгледжаныя вынікі працы за 1-шы квартал і вызначаныя задачы на найбліжэйшую перспектыву.

У пасяджэнні таксама бралі ўдзел міністр падаткаў і збораў Сяргей Налівайка, начальнік Галоўнага фінансавага ўпраўлення Мінгарвыканкама Аляксей Афанасьеў, сябры калегіі, начальнікі раённых падатковых інспекцый і іх намеснікі.

Менск паводле вынікаў 1-га квартала 2015 сабраў 20,2 трлн. рублёў падатковых плацяжоў. Гэта амаль 50% усіх кансалідаваных даходаў Рэспублікі Беларусь, якія кантралююцца Міністэрствам падаткаў і збораў.

Падводзячы вынікі калегіі, Шорац адзначыў, што падатковая інспекцыя горада прапускае працу ў напаўненні бюджэту за кошт унутраных рэсурсаў.

- Занясіце прапановы - што трэба зрабіць, які падатак ўвесці, каб суб'ектам гаспадарання было нявыгадна ўтрымліваць актывы, зямлю, маёмасць, што неэфектыўна выкарыстоўваюцца, - звярнуўся старшыня Мінгарвыканкама да кіраўніцтва падатковай інспекцыі.

Шорац звярнуў асаблівую ўвагу на працу з малым бізнэсам, а таксама з прадпрыемствамі грамадскага харчавання. У якасці прыкладу прывёў сетку ўстаноў грамадскага харчавання на рынку "Ждановічы", дзе ідзе велізарны паток наяўных грошай, чэкі не прабіваюцца, а значыць, і далёка не ўсе падаткі выплачваюцца.

- Больш эфектыўна неабходна весці і працу па кватэрах, што здаюцца ў арэнду. Тут неабходна падключыць работнікаў ЖЭС. Варта ўзмацніць інфармаванне насельніцтва, выкарыстоўваючы сучасныя тэхналогіі, больш актыўна супрацоўнічаць са СМІ, тлумачыць гараджанам на навочных і зразумелых прыкладах патрэбу выконваць падатковае заканадаўства, - заявіў Шорац.

Міністр падаткаў і збораў пагадзіўся з крытычнымі заўвагамі старшыні Мінгарвыканкама.