Ізраільскія ВПС нанеслі ўдары па сектары Газа ў адказ на абстрэл

Вайскова-паветраныя сілы Войска абароны Ізраіля нанеслі серыю ўдараў па сектары Газа.

Паводле паведамлення прэс-службы ЦАХАЛа, мэтай нападу стала тэрарыстычная інфраструктура на поўначы сектара, у раёне Бейт-Хануна, паведамляе NEWSru Israel.

Дзеянні ЦАХАЛа сталі рэакцыяй на ракетны абстрэл ізраільскай тэрыторыі напярэдадні вечарам, падкрэслівае вайсковая прэс-служба. Тэрарыстычная арганізацыя "Хамас", якая знаходзіцца ва ўладзе ў сектары Газа, заявіла аб сваёй недатычнасці да абстрэлу. Аднак ЦАХАЛ ускладае віну за тое, што адбываецца на тэрыторыі сектара, на "Хамас".

Паводле непацверджаных звестак, акрамя ВПС, у аперацыі Ізраіля ў адказ былі задзейнічаныя таксама сухапутныя сілы, прынамсі, танкі, якія вялі агонь па аб’ектах у сектары. Палестынскае агенцтва Maan паведамляе, што ізраільскія танкі выпусцілі не менш за тры набоі па аб'ектах "Брыгад Ізаддзіна аль-Касама" (баявое крыло "Хамас") на поўначы сектара Газа, на ўсход ад Бейт-Хануна.

Акрамя таго, ізраільскія вайсковыя самалёты і баявыя катэры абстралялі мэты ў паўночнай частцы берагавой лініі Газы. У выніку гэтых абстрэлаў ніхто не пацярпеў.

Палестынскае агенцтва Safa паведамляе, што на ўсход ад Бейт-Хануна ізраільскімі вайскоўцамі была абстраляная так званая "6-я база баевікоў "Хамас". Адзначаецца таксама, што ў час абстрэлу над сектарам Газы лёталі ізраільскія верталёты.

"Палестынскі інфармацыйны цэнтр", які належыць "Хамас", не пацвярджае факт удараў па сваіх аб'ектах, заяўляючы, што ізраільскія вайскоўцы абстралялі пусткі і сельскагаспадарчыя ўгоддзі.

Абстрэл тэрыторыі Ізраіля з боку сектара Газа адбыўся ўвечары ў чацвер, 23 красавіка. Паводле звестак ЦАХАЛа, з тэрыторыі сектара па Ізраілю была выпушчаная як мінімум адна ракета. У выніку абстрэлу ніхто не пацярпеў. Ракета разарвалася на незабудаванай мясцовасці.

Гэты ракетны абстрэл стаў першым у 2015 годзе. Да гэтага "Хамас" прадаўжаў рэгулярна запускаць ракеты ў бок мора, правяраючы далёкасць і дакладнасць новых ракет, але ўстрымліваўся ад абстрэлаў ізраільскіх населеных пунктаў пасля заканчэння аперацыі ЦАХАЛа "Непарушная скала" ў жніўні 2014 года.

Аднак баевікі іншых груповак пасля сканчэння антытэрарыстычнай аперацыі чатыры разы абстрэльвалі ізраільскую тэрыторыю: 16 верасня, 1 лістапада і 19 снежня 2014 года, а таксама 23 красавіка 2015. ЦАХАЛ двойчы наносіў удары па тэрарыстычных аб'ектах у Газе ў адказ на гэтыя адзінкавыя абстрэлы.