Рэйс Germanwings у Вэнэцыю перанакіравалі ў Штутгарт

Самалёт Airbus А319 авіякампаніі Germanwings, які выконваў рэйс з Кёльна ў Вэнэцыю, быў перанакіраваны і прызямліўся ў Штутгарце.

Прычынай незапланаванай пасадкі стала падазрэнне на выцек алівы, паведамляе Lenta.ru са спасылкай на Reuters.

Рэйс 4U814 адправіўся ў Італію з нямецкага горада Кёльн а 09:55 мясцовага часу (10:55 менскага). Пад 11:00 паводле мясцовага часу (12:00 менскага) датчыкі на прыладнай панэлі лайнера паказалі выцек алівы, што і стала прычынай прыняцця пастановы пілотаў судна адправіцца ў Штутгарт, піша ТАСС. Пры гэтым адзін з рухавікоў самалёта з меркаванняў бяспекі быў вымкнуты.

На борце А319 знаходзіліся 123 пасажыры і 5 чальцоў экіпажа. Са слоў кіраўніка штутгарцкага аэрапорта Георга Фундэля, ніхто з іх не пацярпеў. Пасля пералёту самалёт быў агледжаны тэхнікамі.

Чакаецца, што пасажыры рэйса 4U814 адправяцца ў Вэнэцыю іншым бортам нямецкага авіяперавозніка.

Як запэўніла авіякампанія, гэта была стандартная працэдура для гарантавання бяспекі і прызямленне ў нямецкім горадзе не з'яўлялася аварыйнай пасадкай.

Раней, 3 красавіка, іншы самалёт гэтай авіякампаніі, які ладзіў пералёт з Гановэра ў Рым, здзейсніў экстраную пасадку ў аэрапорце Вэнэцыю праз немач пасажыркі ды сцюардэсы.

Germanwings - лаўкостэр, які з'яўляецца даччынай кампаніяй нямецкага авіяперавозніка Lufthansa. Адзін з лайнэраў авіякампаніі Airbus А-320, які выконваў рэйс з Барсэлоны ў Дзюсэльдорф, упаў 24 сакавіка ў французскіх Альпах. 150 чалавек, якія знаходзіліся на борце самалёта, у тым ліку 6 чальцоў экіпажа, загінулі.

На падставе звестак, атрыманых з першага бартавога самапісца, зробленая папярэдняя выснова, што ў здарэнні вінаваты другі пілот самалёта Андрэас Лубіц. Паводле версіі следства, калі камандзір экіпажа на некалькі хвілін выйшаў з кабіны пілотаў, Лубіц замкнуўся там і наўмысна накіраваў лайнэр дадолу. Падчас расследавання таксама выяўлена, што ў загінулага пілота былі праблемы са здароўем. У мінулым ён лячыўся праз схільнасць да суіцыду. На дзень катастрофы Лубіц меў лісток непрацаздольнасці.

Фота з архіву AP