Студэнты і выкладчыкі РДГУ сарвалі лекцыю лідара «Антымайдану»

РДГУ стаў адзіным ВНУ, студэнты і выкладчыкі якога выступілі супраць "агітацыйнай брыгады" "Антымайдану".

У Маскве студэнты і выкладчыкі Расейскага дзяржаўнага гуманітарнага ўніверсітэта зладзілі ў чацвер акцыю пратэсту падчас выступу аднаго з лідараў руху "Антымайдан", палітолага-"патрыёта" Мікалая Старыкава, паведамляе "Радыё Свабода".

Лекцыя Старыкава павінна была адбыцца ў рамках турнэ актывістаў "Антымайдану" па расейскіх ВНУ, у рамках якога аб "змове Захаду супраць Расеі" студэнтам ужо спрабавалі распавядаць лідар "Начных ваўкоў" Аляксандр Залдастанаў (Хірург) і старшыня парламента так званай Наваросіі Алег Цароў.

Як напісала ў твітэры раніцай у чацвер студэнтка РДГУ Таццяна Волкава, "Старыкаў ужо паўтары гадзіны прамаўляе. З аўдыторыі паволі знікаюць слухачы. Немагчыма чуць па 50 раз: геапалітыка, Крым, лібералы". Палітолаг прыехаў у РДГУ ў межах кампаніі для растлумачэння студэнтам расейскіх ВНУ "ўнутранай і замежнай палітыкі". Афіцыйна мерапрыемства называецца "Сцэнарыі будучыні Расеі. Лекцыя-дыскусія". Выступы лідараў "Антымайдану" ўжо адбыліся ў МДТУ імя Баўмана, Фінансавым універсітэце пры Урадзе РФ, РУДН, МДСУ, Інстытуце дзяржаўнага кіравання і права.

Студэнтам Расейскага дзяржаўнага гуманітарнага ўніверсітэта Мікалая Старыкава прадставілі як вядучага расейскага экспэрта ў пытаннях процідзеяння "каляровым рэвалюцыям". Такі тытул ён меў не ў кожным з ВНУ, дзе выступаў напачатку: напрыклад, у анонсе лекцыі ў газеце Маскоўскага дзяржаўнага будаўнічага ўніверсітэта Старыкава, Хірурга і Алега Царова нават не назвалі па імёнах, аб'яднаўшы адным словам "экспэрты".

Мікалай Старыкаў - аўтар кніг "Галоўны вораг Расеі. Усё зло прыходзіць з Захаду", "Хто фінансуе раскіданне Расеі? Ад дзекабрыстаў да маджахедаў", "Хто прымусіў Гітлера напасці на Сталіна. Фатальная памылка Гітлера", "Хаос і рэвалюцыі - зброя даляра" , камерцыйны дырэктар "Першага канала" ў Санкт-Пецярбургу, намінант прэміі газеты "Коммерсант" "Лизость к телу-2010" - праз ягоныя выказванні пра Уладзіміра Пуціна.

Паслухаць выступ Старыкава, паводле сведчання Таццяны Волкавай, сабраліся блізу 20 студэнтаў. Аднак пачатак лекцыі быў фактычна сарваны: некаторыя з тых, хто сядзеў у аўдыторыі, разгарнулі плакаты з надпісамі "Канспіралогіі ва ўніверсітэце не месца", іншыя выйшлі да трыбуны і паспрабавалі адабраць у прамоўцы мікрафон, а дацэнт кафедры гісторыі і тэорыі культуры РДГУ Канстанцін Ерусалімскі распачаў са Старыкавым дыскусію - праўда, без асаблівага поспеху. Са слоў Канстанціна Ерусалімскага, прысутнасць такіх "лектараў" у цэнтральнай аўдыторыі супярэчыць не толькі духу, але і статуту ўніверсітэта:

- Універсітэты - гэта вельмі спецыфічная пляцоўка. Ва ўніверсітэта ёсць свой статут, які не дазваляе праводзіць у сценах ВНУ адкрытыя агітацыйныя мерапрыемствы. Сёння група экспэртаў зладзіла "адкрытую лекцыю-дыскусію", як яны гэта назвалі, на тэрыторыі РДГУ, прычым у цэнтральнай аўдыторыі. Разважаць яны павінны былі пра лёсы Расеі, але, фактычна, прадставіліся як экспэрты ў супрацьдзеянні "аксамітным" і "каляровым рэвалюцыям". Яны - экспэрты ў супрацьдзеянні і разважаць павінны былі пра лёсы Расеі. Вядома, многія проста западозрылі ў гэтым агітацыйна-ідэалагічны складнік.

Прыйшло вельмі мала народу, было відаць, што гэтае мерапрыемства з розных меркаваннях праігнаравала большасць выкладчыкаў і студэнтаў. Па-другое, падыход да праблемы выключаў нармальную дыскусію, супрацьлеглае меркаванне не выслухоўвалася. Старана, якая павінна была апанаваць, адразу ж дэманізавалася і падпадала пад ідэалагічны ціскам. І тое, што мы ўбачылі ў самым пачатку, - відэаролік з пракламацый супраць "аранжавай рэвалюцыі" - дало зразумець: гэта не акадэмічная лекцыя, перад намі ідэолагі, палітычныя актывісты. Таму я для сябе асабіста падумаў пра простае пытанне акадэмічнай гігіены, проста гігіены, прабачце, адразу ж адрэагаваць на тое, што я ўбачыў!

Мерапрыемства было задуманае як ідэалагічны ціск, як ідэалагічная акцыя - выхаваўчая, вядома, паводле класіфікацыі, накіраваная на выкліканне страху і небяспекай рэвалюцыі. І тое, што адбылося, было ідэалагічнай рэакцыяй на ідэалогію. Чаго хацелі, то і атрымалі! Студэнты абурыліся, следам абурэнне пачалі выказваць і выкладчыкі. Старыкаў, які не даваў нікому мікрафон, пачаў вельмі жорстка рэагаваць. Ён пачаў ганіць выступоўцаў, пачаў крытычна ацэньваць пытанні. Відавочна, што з "нацыянал-здраднікамі" і "экстрэмістамі", якія нібыта супраць яго выступаюць, Старыкаву размаўляць не было пра што. Я здзіўляюся, што нас усіх адтуль яшчэ і не забралі ў паліцыю. Я думаю, што гэта проста бязладдзе! Такога нельга дапускаць на тэрыторыі ніводнага ўніверсітэта. Мне шкада, што гэтая кампанія атрымала магчымасць вандраваць па многіх маскоўскім ВНУ.

- Студэнтаў іншых ВНУ маглі проста прыгнаць на гэтую "лекцыю", яны маглі проста сядзець там і займацца сваімі справамі. Значная частка моладзі цяпер - па-за палітычным кантэкстам, студэнты вельмі мала ўдзельнічаюць у грамадскім жыцці краіны. РДГУ - гэта іншая справа?

- Нельга падмяняць веды міфалагічнымі праграмамі, як кажа Эрык Хобсбаўм. Нельга глыбока міфалагізаваныя праграмы прэзентаваць як прадмет для акадэмічных дыскусій. Студэнты вучацца ў першую чаргу крытычна думаць. Для іх вельмі важна, каб дакладчыкі экспліцытна - гэта значыць максімальна даступна і наглядна - дэманстравалі свае метады, паняцці, якімі яны аперуюць, падавалі крыніцы, каб наогул існавала магчымасць дыскусіі. Студэнты вучацца дыскутаваць, яны павінны разумець, што свабодная дыскусія мае месца для нязгоды, ды і наогул да розных пазіцый. Таму пасля абмеркавання з адным з арганізатараў гэтага мерапрыемства я выказаў яму сваё здзіўленне з нагоды фармату, які быў прапанаваны студэнтам. Мы будзем выступаць з пратэстам супраць самой гэтай ідэі расейскай моладзі ды кампаніі. Мы праінфармуем нашую ўніверсітэцкую адміністрацыю, тым больш што яна неаднаразова дае такія пляцоўкі для розных неакадэмічных, відавочна, праўрадавых сіл, якім не месца ў вольным універсітэце. Вось маё меркаванне: гэта татальнае фіяска публічнай сферы ў нашай краіне, грэбаванне правіламі акадэмічнай навукі.

- Вы не баіцеся, што адміністрацыя ўніверсітэта, якая, не выключана, не магла адмовіцца праводзіць гэта мерапрыемства, можа неяк процідзейнічаць вам і іншым актывістам?

- Я нічога не баюся! Я думаю, што тут праўда - на нашым баку. Я ўважаю за свой маральны абавязак гэтую пазіцыю бараніць і надалей, - кажа дацэнт кафедры гісторыі і тэорыі культуры РДГУ Канстанцін Ерусалімскі.

Са слоў аднаго з арганізатараў праекта "Сцэнарыі будучыні Расеі", памочніка дырэктара Інстытута стратэгічных даследаванняў і прагнозаў Мікіты Данюка, "экспэрты праекта - гэта навуковая суполка, гэта вядучыя расейскія экспэрты-спецыялісты ў "каляровых рэвалюцыях", якія не агучваюць ніякую палітычную пазіцыю".

РДГУ стаў адзіным ВНУ, студэнты і выкладчыкі якога выступілі супраць прысутнасці ў сваіх сценах "агітацыйнай брыгады" "Антымайдана". 21 траўня лекцыя-дыскусія "Сцэнарыі будучыні Расеі" прайшла ў МДУ ім. М.В. Ламаносава, у пятніцу яна запланаваная ў Маскоўскім дзяржаўным інстытуце міжнародных дачыненняў.