Прэзідэнцкія выбары ў Польшчы: Рэйтынгі абодвух кандыдатаў практычна роўныя

Пяць найбольш аўтарытэтных рэйтынгавых агенцтваў апублікавалі вынікі апытанняў выбаршчыкаў.

Пра гэта паведамляе «Newsweek Polska» (пераклад - charter97.org).

Выданне прааналізавала звесткі апошніх апытанняў, пададзеных у чацвер пяццю найбольш аўтарытэтнымі агенцтвамі - «Millward Brown», IBRIS, «Dobra Opinia», «Estymator», CBOS. Два з іх фіксуюць нязначную перавагу (ад 0,4% да 1,2%) дзейнага прэзідэнта Браніслава Камароўскага. Астатнія тры - такую ж нязначную перавагу (не больш за 4%) кандыдата ад «Права і справядлівасць» Анджэя Дуды. Сярэдні вынік апытанняў, паводле аб'яднаных звестках усіх пяці агенцтваў, фіксуе нязначную розніцу ў рэйтынгу абодвух кандыдатаў: 50,8% у Анджэя Дуды і 49,2% у Браніслава Камароўскага.

«Розніца паміж кандыдатамі істотна меншая, чым на выбарах 2010 і 2005 гадоў, а адрыў выглядае выключна выраўнаваным», - адзначае выданне.

Пры гэтым трэба ўлічваць, што рэйтынгавыя даследавання былі апублікаваныя яшчэ да другога тура тэледэбатаў, якія прайшлі ў чацвер вечарам. Паводле звестак апытанняў, гледачы мяркуюць, што на дэбатах лепш выглядаў Браніслаў Камароўскі (42% апытаных), і толькі 31% тэлегледачоў перакананыя, што дэбаты былі паспяховымі для Анджэя Дуды.

Нагадаем, што ў гэтую нядзелю, 24 траўня, адбудзецца другі тур прэзідэнцкіх выбараў у Польшчы. У ім будуць удзельнічаць два кандыдаты, якія ў першым туры атрымалі найбольшую колькасць галасоў, - Анджэй Дуда і Браніслаў Камароўскі. Прэзідэнтам стане кандыдат, які ў другім туры набярэ больш галасоў.