ААН: Колькасць ахвяр канфлікту на Данбасе перасягнула 6360 чалавек
3- 1.06.2015, 18:40
- 45,926
У новай справаздачы арганізацыі таксама адзначаецца, што раны атрымалі 15,7 тысяч чалавек, а колькасць унутрана перамешчаных асоб дасягнула 1,2 млн чалавек.
З пачатку ўзброенага канфлікту на Данбасе загінулі 6362 чалавекі. Пра гэта ідзе гаворка ў дакладзе назіральнай місіі правоў чалавека Арганізацыі Аб'яднаных Нацый (ААН), прысвечаным сітуацыі ва Украіне, і апублікаваным на афіцыйным сайце арганізацыі, піша ЛІГАБізнесІнформ.
У дакуменце адзначаецца, што агулам, "з пачатку баявых дзеянняў у сярэдзіне красавіка 2014 года да 15 траўня 2015 года, сама менш, 6 362 чалавекі (у тым ліку, 625 жанчын і дзяўчатак) былі зарэгістраваныя як забітыя і яшчэ 15 775 - як параненыя ў зоне канфлікту на ўсходзе Украіны". "Шмат хто з людзей лічыцца зніклым без вестак", - падкрэсліваецца ў справаздачы.
Пры гэтым экспэрты ААН зафіксавалі зніжэнне колькасці невыбіральных абстрэлаў у зоне канфлікту на Данбасе.
Акрамя таго, у справаздачы сказана, што ў агульным ад наступстваў узброенага супрацьстаяння пацярпелі 5 мільёнаў чалавек, а колькасць унутрана перамешчаных асоб дасягнула 1,2 млн чалавек.
Нагадаем, раней у ААН паведамлялі, што за год баявых дзеянняў на Данбасе колькасць ахвяраў перасягнула 6100 чалавек.
Акрамя таго, паводле звестак арганізацыі, у гуманітарнай дапамозе маюць патрэбу 3,2 мільёна жыхароў усходняй Украіны. У раёнах, якія не кантралююцца ўрадам, шмат якія жыхары пазбаўленыя паўнавартаснай медыцынскай дапамогі, у тым ліку – праз нястачу медыкаментаў.