Рада Еўропы нагадала Расеі пра завінавачанасць перад ЮКАСам
2- 11.06.2015, 21:02
- 3,355
Рада Еўропы нагадала Расеі, што ў яе засталося чатыры дні, каб даць графік аб выплаце €1,86 млрд ЮКАСа.
Тым часам паводле Гаажскага арбітражу на $50 млрд ужо набегла адсоткаў амаль на $360 млн, піша РБК.
Камітэт міністраў Рады Еўропы (КМРЕ) кантралюе выкананне краінамі пастаноў ЕЗПЧ. Паводле вынікаў пасяджэння 11 чэрвеня КМРЕ канстатаваў, што Расея пакуль не спяшаецца выконваць свае абавязанні ў справе ЮКАСа. Яшчэ ў сакавіку КМРЕ абавязаў расейскую старану у тэрмін да 15 чэрвеня падаць план выканання пастановы, у тым ліку дэталёвы, абавязковы графік выплат кампенсацый былым акцыянерам нафтавай кампаніі ЮКАСа, аднак КМРЕ дагэтуль не атрымаў ад Расеі ніякіх указанняў, ні дакументаў.
У прэс-службе Рады Еўропы растлумачылі, што пакуль камітэт міністраў чакае надыходу дэдлайну, перш чым вынесці якую-небудзь пастанову. Намеснікі міністраў замежных спраў краін, якія ўваходзяць у Раду Еўропы (іх 47, у тым ліку і Расея) вернуцца да разгляду гэтага пытання ў верасні.
«Улічваючы, што дэдлайн мінае праз некалькі дзён, і што камітэт міністраў дагэтуль не атрымаў ніякіх указанняў ад расейскіх уладаў з нагоды распрацоўкі названага плана дзеянняў, КМРЕ заклікаў расейскія ўлады зрабіць усе патрэбныя намаганні ў шчыльным супрацоўніцтве з сакратарыятам з мэтай захавання адпаведнай пастановы ЕЗПЧ», - адзначаецца ў пастанове пасяджэння.
31 ліпеня 2014 г суд абавязаў Расею выплаціць былым акцыянерам ЮКАСа €186 млрд. Расея паспрабавала абскардзіць гэтую пастанову, але ў снежні 2014 суд пацвердзіў свой вердыкт. Кіраўнік расейскага Мінюста Аляксандр Канавалаў заявіў РІА «Новости» 17 снежня: «Мы вымушаны яе [пастанову] прымаць». Ён таксама дадаў, што «жыццё пакажа, у якой ступені гэтая пастанова можа быць выкананая РФ».
Тым часам паводле іншай пастановы на карысць ЮКАСа, якую ў канцы ліпеня 2014 года вынесла сталая палата Арбітражнага суда ў Гаазе, і якую Расея адмовілася прызнаваць у адрозненне ад пастановы ЕЗПЧ, працягваюць расці адсоткі.
Гаажскі арбітраж пастанавіў, што Расея павінна выплаціць былым акцыянерам нафтавай кампаніі кампенсацыю за банкруцтва яе актываў у 2004 годзе сумай $50 млрд.
З 15 студзеня 2015 на гэтую суму штодня налічваюцца адсоткі зыходзячы са стаўкі паводле 10-гадовых аблігацыях Федэральнай рэзервовай сістэмы ЗША - гэта $2,4 млн за дзень, або амаль $887 млн за год. Такім чынам, штраф на карысць акцыянераў ЮКАСа паводле стану на 11 чэрвеня ўжо дасягнуў амаль $360 млн (19,6 млрд руб).
Былыя акцыянеры ЮКАСа збіраюцца дамагацца выканання арбітражнай пастановы ў ЗША, Вялікабрытаніі і Францыі, дзе яны яе ўжо зарэгістравалі. Кіраўнік GML - кампаніі, якая прадстаўляе інтарэсы былых акцыянераў ЮКАСа ў судзе, - Цім Осбарн распавядаў Sueddeutsche Zeitung, што былыя акцыянеры нафтавай кампаніі вызначылі для сябе магчымыя мэты [актывы РФ для арышту] ў Нідэрландах і Бэльгіі, а таксама разглядаюць магчымасць звароту ў суды Нямеччыны.
Расея адмовілася прызнаваць легітымнасць гэтай пастановы і выплачваць грошы былым «юкасаўцам» і ў канцы лістапада абскардзіла гэтую пастанову ў Арбітражным судзе Гаагі.
У канцы траўня міністр юстыцыі РФ Аляксандр Канавалаў у рамках Пецярбуржскага міжнароднага юрыдычнага форуму заявіў, што Расея мае намер уступіць у судовыя цяжбы з акцыянерамі ЮКАСа і дамагацца прадухілення выканання пастановы Гаажскага суда. «Пастанова Гаажскага суда, з нашага пункту гледжання, няправільная. Але мы павінны рэагаваць на развіццё сітуацыі», - сказаў Канавалаў.