У Берасці затрымалі апазіцыянерку з Таджыкістана

У Беларусі паводле запыту ўладаў Таджыкістана затрыманая сябар апазіцыйнага аб'яднання таджыкскай апазіцыі ў эміграцыі «Група 24» Шабнам Худайдодава.

Пра гэта паведаміла ў пятніцу ў сваім блогу прэзідэнт асацыяцыі «Правы чалавека ў Цэнтральнай Азіі» Надзея Атаева.

«У сацыяльных сетках яна актыўна падтрымлівала крытычныя меркаванні палітычнай апазіцыі Таджыкістана, падкрэслівала неабходнасць дэмакратычных рэформаў у роднай краіне. Па магчымасці Ш.Худайдодава ўдзельнічала ў гуманітарных акцыях у падтрымку таджыкскіх працоўных мігрантаў», - цытуе Атаеву «Інтэрфакс».

Чалец апазіцыйнага руху цяпер утрымліваецца ў следчым ізалятары ў Берасці. Яна была затрыманая ў чыгуначным пункце пропуску «Брэст».

«29-гадовая дзяўчына знаходзіцца ў міждзяржаўным вышуку за экстрэмісцкую дзейнасць на тэрыторыі сваёй краіны. Цяпер развязваецца пытанне аб яе экстрадыцыі на радзіму», - паведамілі ў прэс-службе Берасцейскай Чырванасцяжнай памежнай групы.

«Асацыяцыя» Правы чалавека ў Цэнтральнай Азіі «выказвае занепакоенасць у сувязі з пагрозай высылкі Шабнам Худайдодавай у Таджыкістан. За адкрытае выказванне свайго меркавання ў сацыяльных сетках, у Таджыкістане ёй пагражаюць катаванні і пазбаўленне волі на тэрмін да 20 гадоў», - сцвярджае Атаева.

Яна заклікала офіс Управы вярхоўнага камісарыята ў справах бежанцаў ААН у Менску аказаць дапамогу прыхільніцы таджыкскай апазіцыі, а таксама нагадала Беларусі пра Канвенцыю ААН супраць катаванняў, якая забараняе высылку падазраванага ў краіну, дзе яму могуць пагражаць катаванні.

Лідар «Групы 24» Умаралі Куватаў быў забіты невядомымі ў Стамбуле 5 сакавіка гэтага года. Ягоныя прыхільнікі называюць забойства палітычным, тады як улады Таджыкістана паказваюць на крымінальныя сувязі забітага.

У Душанбэ неўзабаве пасля забойства Куватава прайшлі тры судовыя працэсы над чальцамі «Групы 24», абвешчанай Вярхоўным судом экстрэмісцкай. Усяго былі асуджаныя пяцёра чалавек на тэрміны зняволення ад трох да 17 гадоў.

Цягам апошніх паўгода было затрымана не менш за дзясятак прыхільнікаў «Групы 24». Яе кіраўніцтва сцвярджае, што ўсяго было затрымана 32 апазіцыянеры, многія з якіх затрыманыя на тэрыторыі Расеі і затым экстрадаваныя на радзіму. Генпракуратура не паведамляе дакладную колькасць затрыманых, называючы іх колькасць абцякальным тэрмінам «больш за дзесяць».

«Група 24» патрабуе правядзення ў Таджыкістане сумленных пазачарговых прэзідэнцкіх выбараў. Да гэтага часу ніводныя выбары ў гэтай краіне заходнія назіральнікі не прызнавалі адпаведнымі агульнасусветным стандартам дэмакратыі.