«Беларускага шпега» асудзілі на 7 гадоў турмы
11- 2.06.2015, 21:21
- 6,980
Беларус пад выглядам супрацоўніцтва з польскай выведкай падманным чынам атрымаў 319 тысяч даляраў і 18 тысяч еўраў.
8 гадоў беларус Аляксандр Лянюка "гуляў" з польскімі вайсковымі інфармацыйнымі службамі ў ката і мыш, перадае Польскае радыё.
Ён даваў супрацоўнікам контрвыведкі недакладную інфармацыю, а тыя яму за гэта шчодра плацілі. Суд прысудзіў грамадзяніна Беларусі на 7 гадоў турмы.
22 траўня пастанову ў працэсе беларуса прыняў Апеляцыйны суд у Варшаве. Прысуд увайшоў у дзеянне. Яго асудзілі за сфальшаванае супрацоўніцтва са спецслужбамі і вымаганне 319 тысяч даляраў і 18 тысяч еўраў. Гэтыя грошы палякі плацілі яму за "сакрэтныя матэрыялы", якія беларус браў з агульнадаступных крыніц у інтэрнэце.
Летась у снежні Лянюку асудзіў Акруговы суд у Варшаве. Згодна з судовым выракам, з 1999 да 2007 года ён хлусіў польскім спецслужбам. Апеляцыйны суд змяніў прысуд, прызнаўшы, што Лянюка "гуляў" з WSI не ў рамках аперацыйнай гульні беларускай выведкі супраць Польшчы, а з уласнай ініцыятывы.
Паведамляецца, што польская выведка завербавала Аляксандра Л. у 1999 годзе. Да 2007 года ён пастаўляў ёй інфармацыю, якая выявілася хлуслівай. Так, ён паведамляў аб меркаваных агентах Беларусі ў найважнейшых інстытутах польскай дзяржавы. Даў фальшывы спіс афіцэраў КДБ і сакрэтныя дакументы Беларусі. Напраўду, як выявілася, беларус даваў інфармацыю з публічных крыніц, ды яшчэ і з савецкіх часоў. Ён проста фальсіфікаваў інфармацыю.