Следчыя з Нідэрландаў завяршылі работы на месцы крушэння «Боінга» на Данбасе
6- 28.06.2015, 10:36
- 14,125
Галандскія следчыя завяршылі работы на месцы крушэння Boeing у Данецкай вобласці.
Пра гэта паведаміла ў суботу ўвечары пракуратура Нідэрландаў, паведамляе ТАСС.
"Пры падтрымцы місіі АБСЕ спецыялісты атрымалі доступ да Данецкай вобласці, - адзначылі ў пракуратуры. - Самыя важныя задачы місіі былі запланаваныя ў гэтым рэгіёне".
Спецыялісты ўзялі пробы глебы ў розных месцах і правялі тэхнічныя даследаванні для высвятлення месцазнаходжання вышак сотавай сувязі і праверкі працы тэлефонных сетак на ўсходзе Украіны.
Атрыманая падчас місіі інфармацыя будзе вывучаная і прааналізаваная ў Нідэрландах.
У пракуратуры адзначылі, што місія не змагла атрымаць доступ да Луганскай вобласці.
Спецыялісты пачалі работы ва Украіне каля двух тыдняў таму. У склад місіі ўваходзілі прадстаўнікі нацыянальнай паліцыі і міністэрства абароны Нідэрландаў. Асноўная задача місіі заключалася ў зборы доказаў для падмацавання або абвяржэння розных версій катастрофы.
Як вядома, раней Нідэрланды выступілі з прапановай стварыць міжнародны трыбунал паводле гэтага пытання. Украіна ўжо падтрымала такую ідэю.
У той жа час, у МЗС Расеі выказаліся супраць ідэі стварэння міжнароднага трыбунала для пакарання вінаватых у крушэнні малазійскага Boeing ва Украіне, назваўшы яе несвоечасовай і контрпрадуктыўнай.
Паводле звестак украінскіх сілавікоў пасажырскі самалёт быў збіты тэрарыстамі з зенітна-ракетнага комплексу "Бук". Такую зброю баевікі Данбаса маглі атрымаць з Расеі.
Раней аўтарытэтны даследчы праект Bellingcat апублікаваў серыю расследаванняў аб тым, што ракетная ўстаноўка "Бук", якой збілі самалёт, была дастаўленая з Расеі і кіравалася расейскімі вайскоўцамі.