Адстаўка Блатэра - «добры дзень для футбола»

Прадстаўнікі футбольнага свету задаволеныя тым, што Зэп заявіў пра намер пакінуць пасаду прэзідэнта ФІФА.

Учора, 2 чэрвеня, Зэп Блатэр абвясціў аб тым, што больш не хоча ўзначальваць Міжнародную футбольную асацыяцыю. Футбольная грамадскасць пазітыўна адрэагавала на гэтую навіну. Так, легендарны партугальскі футбаліст Луіш Фігу, які раней меў намер ісці на выбары прэзідэнта ФІФА, але затым зняў сваю кандыдатуру, заявіў: «Гэта добры дзень для футбола! Змены нарэшце адбываюцца. Цяпер нам трэба адказна і спакойна знайсці развязанне, якое задаволіць увесь свет, каб пачаць эру празрыстасці і дэмакратыі ў ФІФА».

Задаволеныя сыходам Блатэра і спонсары ФІФА. Скандал, што прагрымеў на мінулым тыдні значна ўдарыў па іміджы арганізацыі, а значыць, і па кампаніям, якія супрацоўнічаюць з ФІФА. У сваіх водгуках на навіну аб сыходзе швейцарца спонсары казалі аб «вяртанні даверу ўсяго свету», піша football.ua.

Раней з нагоды адстаўкі Блатэра выказаліся прэзідэнт Украіны Пятро Парашэнка, а таксама кіраўнік УЕФА Мішэль Плаціні, які рэзюмаваў: «Гэта была цяжкая, адважная і правільная пастанова».

Адзначым, што сам Блатэр у сваёй прамове падкрэсліў, што не адчувае даверу з боку ўсяго футбольнага свету. Кандыдатамі на пасаду прэзідэнта пакуль з'яўляюцца Прынц Алі, які ўдзельнічаў у апошніх выбарах, а пазней падтрымаў пастанову Блатэра сысці ў адстаўку, а таксама знакаміты ў мінулым футбаліст Давід Жынола.