ЗША абвінавацілі Расею ў эскалацыі канфлікту на Данбасе

Дзярждэп ЗША не выключыў пашырэння санкцый супраць Расеі.

Улады ЗША ўважаюць РФ за адказную ў эскалацыі канфлікту на Данбасе, дзе ў сераду ўпершыню за доўгі час пачаліся маштабныя баі паміж украінскімі вайскоўцамі і прыхільнікамі самаабвешчанай Данецкай народнай рэспублікі, паведамляе BBC.

Афіцыйная прадстаўніца дзяржаўнага дэпартамента Мэры Харф заявіла, што баі пад Мар’інкай пачаліся з наступу прыхільнікаў «ДНР». Наўпроставую адказнасць за прадухіленне такіх інцыдэнтаў, на думку Харф, нясе Расея.

У сувязі з гэтым прадстаўніца дзярждэпартамента не выключыла пашырэння санкцый супраць Расеі. Са слоў Харф, такі варыянт развіцця падзей будзе магчымы ў выпадку далейшай эскалацыі канфлікту.

Раней украінскія вайскоўцы і кіраўніцтва так званай ДНР абвінавацілі адзін аднаго ў парушэнні рэжыму спынення агню.