Міністр фінансаў Грэцыі: Мы не можам друкаваць драхмы
7- 2.07.2015, 14:39
- 7,950
Грэцыя не можа вярнуцца да друку драхмаў, бо ў краіне больш няма адпаведных друкаваных станкоў.
Пра гэта заявіў міністр фінансаў краіны Яніс Варуфакіс, паведамляе расейская служба BBC.
Як растлумачыў чыноўнік, у 2000 годзе, калі Грэцыя ўвайшла ў еўразону, улады краіны паспяшаліся пазбавіцца ад станкоў для друку драхмаў, бо былі ўпэўненыя, што цяпер у краіне заўсёды будзе ў абарачэнні адзіная еўрапейская валюта. «Мы знішчылі ўсе станкі - цяпер у нас іх не засталося», - сказаў Яніс Варуфакіс у інтэрв'ю аўстралійскай радыёстанцыі ABC.
Раней паведамлялася, што вяртанне Грэцыі да ранейшай нацыянальнай валюты магчымае ў выпадку яе выхаду з еўразоны праз нязгоду з умовамі Еўразвязу.
Экспэрты асцерагаюцца, што рэанімаваная драхма пачне хутка губляць ў кошце, што прывядзе да небяспекі інфляцыі, бо цэны на імпарт пачнуць расці.
Таксама могуць узнікнуць складанасці з фінансавым бокам кантрактаў пры ўзаемным разліку ў розных валютах.