Амбасада Беларусі стварае «чорны спіс» расейскіх кампаній

Пасольства Беларусі ў Расеі працуе над стварэннем базы звестак нядобрасумленных кампаній, якія не расплачваюцца з беларускімі пастаўшчыкамі.

Пра гэта паведаміў генеральны пракурор Аляксандр Канюк падчас правядзення сумеснай калегіі Генеральных пракуратур Расеі і Беларусі, піша «Ежедневник».

З яго слоў, сёння нават складана сказаць якая са сфер эканомікі Беларусі пакутуе больш ад пратэрмінаванай дэбіторскай запазычанасці.

Для стварэння спецыяльнай базы звестак Пасольства Беларусі ў Расеі заахвоціў праведзены аналіз угод беларускіх прадпрыемстваў з расейскімі партнёрамі. Як паказалі вынікі гэтага аналізу, практычна 30% такіх угод загадзя асуджаныя на правал, так як укладаюцца з сумнеўнымі кампаніямі.

Як заявіў Аляксандр Канюк, у часткі гэтых угод прасочваецца змова паміж службовымі асобамі беларускіх прадпрыемстваў і расейскім контрагентамі.

«Калі ў беларускага прадпрыемства ёсць дэбіторская запазычанасць, то для кіраўніка гэта ўжо чырвонае святло. Тым не менш прадукцыя пры ўжо наяўнай запазычанасці паступае ў расейскую Федэрацыю і знікае бясследна. Гэта чыстае злоўжыванне ўладай», - заявіў генпракурор Беларусі, назваўшы падманшчыкамі такіх кіраўнікоў.

Акрамя таго, ёсць такія выпадкі, калі прадукцыя пастаўляецца ў рамках дзяржзакупак у Расеі, але нават там чыноўнікі не хочуць расплачвацца за яе і дзеляць паміж сабой хабар. Аднак большасць пратэрмінаванай дэбіторскай запазычанасці ўсё ж узнікае праз недахоп інфармацыі аб расейскім контрагенце. Менавіта таму Пасольства Беларусі ў Расеі і наважыла стварыць базу звестак расейскіх кампаній.

Са слоў генпракурора Беларусі, у базу звестак будуць уключаны ўсе расейскія кампаніі, якія працуюць з беларускімі вытворцамі. Па кожнай такой фірме будзе збірацца інфармацыя з дапамогай расейскіх калегаў. У сутнасці гэта будзе база звестак, дзе можна будзе атрымаць інфармацыю аб сумнеўных расейскіх кампаніях.

Аляксандр Канюк адмовіўся назваць, якія беларускія прадпрыемствы маюць самую вялікую дэбіторскую запазычанасць. Для гэтага варта правесці праверкі. З яго слоў, сярод бліжэйшых такіх спраў, якія звязаны з пратэрмінаванай дэбіторскай запазычанасцю - «Гомельскі мясакамбінат».