МТС устанаўлівае адзіны тарыф на званкі ва ўсе сеткі

Аператар МТС першым у Беларусі скасаваў розніцу ў кошце на званкі ўнутры сеткі і на нумары іншых аператараў.

Цяпер абаненты МТС на пастаяннай аснове змогуць тэлефанаваць як унутры сеткі МТС, так і ў іншыя сеткі па адзіным тарыфе, пішуць «Беларускія навіны».

Дзеянні аператара з'яўляюцца адказам на запыты і патрэбы абанентаў, якім больш не прыйдзецца задумвацца, на нумар якога аператара яны тэлефануюць і ў якую суму будзе каштаваць званок. Новаўвядзенне ацэняць і ўладальнікі мабільных прылад з двума SIM-картамі - яны сёння складаюць блізу 30% ад усіх абанентаў мабільнай сувязі ў Беларусі.

«За гады з моманту з'яўлення мабільнай сувязі ў нашай краіне ўзаемаадносіны паміж сотавымі аператарамі і абанентамі практычна не мяняліся: даступныя кошты на ўнутрысеткавыя званкі, больш дарагія - у іншыя сеткі. Склалася своеасаблівае дзяленне на «сваіх» і «чужых». Мы разумеем, што ў эпоху мабільнага інтэрнэту трэба ліквідаваць гэты падзел паміж абанентамі і даць людзям яшчэ больш свабоды ў стасунках. Рынак застаяўся, і яму патрэбныя свежыя канструктыўныя развязанні», - адзначыў кіраўнік дэпартамента маркетынгу МТС Дзяніс Цярэшчанка.

На ягоную думку, у той час, калі мабільны інтэрнэт імкліва набірае папулярнасць, галасавая сувязь павінна стаць максімальна даступнай.

«Гэта палепшыць канкурэнтную сітуацыю на рынку, у выніку чаго выйграе абанент, паколькі атрымае больш магчымасцяў. Стаўленне кліентаў да гэтай ініцыятывы мы ўжо ведаем: яно пазітыўнае. Мы ўжо апрабавалі гэтую ініцыятыву ў рамках акцый і ўбачылі, наколькі запатрабаванай яна была ў абанентаў. Змяняючы парадак тарыфікацыі, мы прагназуем, што паводзіны абанентаў зменяцца: яны стануць больш актыўна і спакайней мець стасункі з кліентамі іншых аператараў», - падкрэсліў прадстаўнік аператара.

Змены ў тарыфікацыі паслуг закранае ўсе тарыфныя прапановы МТС - як актуальныя, так і архіўныя - і распаўсюджваюцца на ўсю абаненцкую базу аператара. Адзіны тарыф не распаўсюджваецца на міжнародныя выклікі і званкі на кароткія нумары.

Мадэрнізаваныя тарыфныя планы набудуць моц 16 ліпеня 2015, паведамляе прэс-служба МТС.