Золатавалютныя рэзервы скараціліся на $438,4 млн

Золатавалютныя рэзервы Беларусі, разлічаныя паводле стандартаў МВФ, на 1 ліпеня 2015 склалі $4 млрд 620,7 млн, скараціўшыся з пачатку года на $438,4 млн, або на 8,7%.

Аб гэтым паведамляецца ў прэс-рэлізе Нацыянальнага банка Беларусі са спасылкай на папярэднія звесткі.

За чэрвень ЗВР паводле стандартаў МВФ павялічыліся на $13,4 млн, або на 0,3%.

ЗВР Беларусі, разлічаныя паводле нацыянальных стандартаў, за студзень-чэрвень скараціліся на $650,4 млн, або на 11,4%, за чэрвень - скараціліся на $156,3 млн (на 3%), і на 1 ліпеня склалі, паводле папярэдніх звестак, $5 млрд 65,6 млн.

"Падтрыманню золатавалютных рэзерваў спрыялі паступленні ад збірання экспартных мытаў на нафтапрадукты, - адзначылі ў рэгулятары. - Адмоўны ўплыў на аб'ём золатавалютных рэзерваў у асноўным аказалі выплаты ўрадам і Нацыянальным банкам Рэспублікі Беларусь вонкавых і ўнутраных абавязанняў у замежнай валюце ў поўным аб'ёме, а таксама памяншэнне кошту золата на міжнародным рынку каштоўных металаў".

Як паведамлялася, за 2014 ЗВР Беларусі паводле стандартаў МВФ скараціліся на $1 млрд 591,8 млн (на 23,9%) да $5 млрд 59,1 млн.

За 2013 ЗВР скараціліся на 17,8%, або на $1 млрд 444,1 млн. Пры гэтым НББ прагназаваў, што ў 2013 годзе рэзервы паводле стандартаў МВФ вырастуць на $0,3-0,7 млрд, або на 3,7- 8,6%, і складуць на канец года не менш як $8,3 млрд.

За 2012 год ЗВР Беларусі паводле стандартаў МВФ выраслі на 2,3% пасля росту на 57,4% у 2011 годзе.

У 2015 годзе Беларусь плануе накіраваць на выплату і абслугоўванне вонкавай пазыкі блізу $4 млрд, у тым ліку $3 млрд павінны скласці выплаты ў асноўнай пазыцы. Для выплаты і абслугоўвання вонкавай дзяржаўнай пазыкі рэспубліка плануе выкарыстаць мыты ад экспарту нафты ўласнай здабычы і вырабленых у рэспубліцы нафтапрадуктаў, а таксама правесці замежныя запазычанні ў выглядзе еўрабондаў і сіндкрэдытаў на агульную суму $1 млрд.