Абітурыенты лепш за ўсё здалі...кітайскую мову

Міністэрства адукацыі апублікавала сярэднія балы па ЦТ.

Міністэрства адукацыі ўпершыню апублікавала, з якімі баламі справіліся з тэставаннем выпускнікі розных навучальных устаноў - ад ПТВ да ліцэяў. Лічбы, у прынцыпе, пацвярджаюць тое, што і так ведаюць усе бацькі: каб дзіця без праблем паступіла ў ВНУ, трэба вучыцца ў гімназіі. А яшчэ лепш - у ліцэі. Асабліва наглядна гэта бачна на самых праблемных прадметах - матэматыцы і фізіцы. Выпускнікі звычайных школ па гэтых прадметах атрымалі ў гэтым годзе ў сярэднім 27,19 і 25,86 бала. Гімназісты - 46,25 і 44,59 бала адпаведна. А ліцэісты - 51,32 і 52,15 бала. Зусім сумныя вынікі па матэматыцы і фізіцы ў выпускнікоў ПТВ - усяго 12,76 і 13,41 бала. А гэта менш, чым мінімальны прахадны бал па гэтых прадметах, які дае права на паступленне ў гэтым годзе, піша kp.by.

Самы высокі сярэдні бал сярод усіх прадметаў у кітайскай мовы - 79 балаў - абсалютна зразумелы. Па-першае, здавалі яго толькі выпускнікі гімназій, дзе вывучаюць гэты мову. На такім тэсце не прыйдзеш і не патыкаеш наўздагад у клеткі бланка. Да таго ж здавалі кітайскую мову ўсяго 10 чалавек на ўсю краіну. І, мяркуючы з усяго, не пралічыліся. Да такога сярэдняга бала набліжаецца толькі вынік па гішпанскай мове - 69,52 бала. Горш за ўсё гімназісты справіліся з геаграфіяй - толькі 42,63 бала. А найлепшыя вынікі ў выпускнікоў звычайных школ па грамадазнаўстве - 44,54 бала.

- Сістэма цэнтралізаванага тэставання яшчэ раз даказала сваю жыццяздольнасць, эфектыўнасць, - заявіў міністр адукацыі Міхаіл Жураўкоў.

І распавёў пра тое, як будзе мяняцца ЦТ у будучыні. Міністэрства адукацыі абяцае падумаць аб тым, што абітурыентам дазволяць здаваць не тры, а чатыры тэсты, «каб пашырыць абітурыентам магчымасць выбару прафесіі». Плюс міністэрства плануе ўвесці ў тэсты частку З, якая будзе адрознівацца для розных ВНУ.

- Напрыклад, калі ўзяць фізічны факультэт БДУ і ўсякі тэхнічны факультэт, то, вядома, патрабаванні да абітурыенту ў веданні фізікі будуць розныя, - растлумачыў міністр.