Адны супраць праўды

Калі расейскі народ усвядоміць гэта, пад пагрозай правалу можа апынуцца не толькі ўсходнеўкраінская авантура Пуціна, але і ўлада ягонага рэжыму.

Расея наклала вета на рэзалюцыю аб стварэнні міжнароднага трыбунала ў расследаванні катастрофы малайзійскага "Боінга" у паветранай прасторы над усходам Украіны. Тым самым Пуцін абараняе ўласную ўладу, піша аглядальнік швейцарскай газеты Neue Zuercher Zeitung Крысціян Вайсфлог (пераклад - Инопресса.ру).

Пяць краін, якія вядуць сумеснае расследаванне катастрофы рэйса MH17, - Нідэрланды, Малайзія, Аўстралія, Бэльгія і Украіна - меркавалі, што трыбунал ААН з'яўляецца самым надзейным спосабам пакараць асоб, вінаватых у гібелі 298 чалавек, якія знаходзіліся на борце збітага лайнера. Ведала гэта і расейскае кіраўніцтва. Але Масква не хоча расследавання, годнага даверу, мяркуе аўтар.

Для Масквы значна прасцей адмовіцца ад супрацоўніцтва з судом, які не атрымаў мандат ад міжнароднай супольнасці. Акрамя таго, крамлёўскім прапагандыстам лягчэй зганьбаваць такі суд як прадузяты.

"Які б суд ні займаўся гэтай справай, верагоднасць таго, што адказных асоб варта шукаць у Расеі, вельмі вялікая, - гаворыцца ў артыкуле. -"Боінг-777" "Малайзійскіх авіяліній" быў збіты 17 ліпеня 2014 года, як мяркуецца, зенітнай ракетай, пастаўленай украінскім апалчэнцам Расеяй. Гэта - самы верагодны сцэнар, у тым ліку на погляд міжнародных следчых, якія знайшлі ў апошнія месяцы новых сведак, якія падмацоўваюць гэтую версію". Навошта Расеі баяцца трыбунала ААН, калі яна недатычная да катастрофы?

А адказ такі: "Калі следству ўдасца сабраць дастаткова доказаў, якія пацвярджаюць гэтую версію, Крэмль страціў бы твар не толькі перад сусветнай супольнасцю, але і перад уласным народам".

Калі годны даверу суд дакажа меркаваную віну рускіх, гэта разбурыць скажоную расейскім тэлебачаннем карціну свету і канчаткова выкрые велізарную хлусню Крамля пра тое, што на ўсходзе Украіны няма расейскіх вайскоўцаў, а баявыя дзеянні там - гэта выключна грамадзянская вайна, гаворыцца ў артыкуле. У рэчаіснасці расейскае кіраўніцтва ўзбройвае сепаратыстаў і пасылае туды расейскіх салдат, а без анэксіі Крыма і прасочвання баевікоў у Данбас справа б ніколі не дайшла да вайны і, адпаведна, знішчэння пасажырскага лайнера.

"Калі хутка расейскі народ усвядоміць гэта, пад пагрозай правалу можа апынуцца не толькі ўсходнеўкраінская авантура Пуціна, але і ўлада ягонага рэжыму. А паколькі ўтрыманне ўлады - прыярытэт у аўтарытарных кіраўнікоў, ісціна павінна застацца на задворках", - падагульняе Вайсфлог.