Сусветны банк: Вяртанне Ірана на нафтавы рынак знізіць кошт нафты на $10
- 11.08.2015, 9:18
- 16,088
Зняцце санкцый з Тэгерана значна паўплывае на сусветны нафтавы рынак ды іранскую эканоміку.
Поўнае вяртанне Ірана на сусветны рынак прычыніцца да падзення кошту нафты на $10 за барэль у наступным годзе. Да такой высновы прыйшлі ў дакладзе экспэрты Сусветнага банка, піша "Лiга.нет".
"Гэтак жа, як ўзмацненне жорсткасці санкцый ў 2012 годзе прычынілася да значнага зніжэння экспарту іранскай нафты і двух гадоў падзення эканомікі, мы чакаем, што скасаванне санкцый падвысіць экспарт і ажывіць эканоміку (Ірана)", - сказаў Шанта Дэвараджан, галоўны эканаміст Сусветнага банка Блізкага ўсходу і Паўночнай Афрыкі.
На іх думку, зняцце санкцый таксама прычыніцца да росту іранскай эканомікі на 5% у 2016 замест прагназаваных 3% у гэтым годзе. Вялікабрытанія, Кітай, Індыя, Турцыя і Сірыя здабудуць ад росту аб'ёмаў гандлю з Іранам. Інвестыцыі ў гэтую ісламскую рэспубліку могуць дасягнуць $3 млрд.
Нагадаем, 10 жніўня каціроўкі WTI знізіліся да $43,85 за барэль, Brent - да $48,52 за барэль.