Жонка расейскага вайскоўца: «У Баранавічах будзе стаяць наш полк»
34- 19.08.2015, 10:20
- 20,530
Расейка ў сацсецях цікавіцца ў жыхароў Баранавічаў аб умовах жыцця ў горадзе.
У адной з баранавіцкіх груп у «Вконтакте» з'явіўся запіс ад расейкі Анастасіі Алёхінай - тая пытаецца чытачоў аб умовах жыцця ў горадзе, пра дзіцячыя садкі.
Прычына яе цікавасці ў тым, што яе мужу-авіятэхніку з Курска прапанавалі перавесціся служыць у Баранавічы ў расейскі авіяполк.
У перапісцы з журналістам «Нашай Нiвы» жанчына распавяла пра меркаваны пераезд падрабязней.
«Ідзе набор у расейскі полк, хутчэй за ўсё ён будзе ў Баранавічах, - напісала Анастасія. - Мужу прапанавалі ехаць туды служыць. Праўда, пакуль нам нічога не патлумачылі, сказалі ж толькі ўчора».
Жанчыну цікавяць жыллё ў горадзе, кошты і перспектывы працаўладкавання для жанчын з расейскім грамадзянствам.
«У нас тут (у Курску) проста усё ўладкована: і праца ёсць, і жыллё, і машына. Вагаемся, ці варта пераязджаць», - падзялілася Анастасія.
Аляксандр Лукашэнка ў інтэрв'ю заяўляў, што расейская вайсковая прысутнасць у Беларусі нязначная.
«На нашай тэрыторыі дзве абсалютна мірныя вайсковыя базы. База ў Баранавічах - там напэўна тры чвэрці нашых людзей служаць. База ў Ганцавічах - можна сказаць інжынерная высокатэхналагічная станцыя, якая вядзе кантроль за пускам ракет. Яны могуць атакаваць Украіну? Не. Самалёты я ў іх прасіў: «Дайце ці прадайце «за бясцэнак» дзесятак самалётаў. Чэмпіянат свету мне трэба ў плане бяспекі забяспечыць. Яны сказалі, што могуць тры самалёты даць. Я кажу: «Добра, адзін ваш лётчык і два нашых». Я не ведаю, нясуць яны зараз дзяжурства ці не. Па-мойму, іх паменшала сёння. Самалётаў расейскіх ў нас тут няма».
У той жа час планы размяшчэння ў Баранавічах расейскага авіяпалка агучваліся яшчэ ў 2013 годзе. Тады Сяргей Шайгу, знаходзячыся з візітам у Менску, заявіў аб намеры Расеі стварыць у Беларусі авіябазу да 2015 года. Ішла гаворка аб размяшчэнні там 24 знішчальнікаў.
Відавочна, расейцы не адступаюць ад плана.