Някляеў: Чаму я не змагаўся з Дзмітрыевым? А што я адзін магу супраць спецслужбаў?

Уладзімір Някляеў выступіў з жорсткай крытыкай кіраўніка грамадзянскай кампаніі «Гавары праўду».

Заява палітыка прагучала на сённяшняй прэс-канферэнцыі лідараў дэмакратычных сіл у Менску, паведамляе «Радыё Свабода».

«Мяне папракаюць, чаму я не зрабіў усё, што можна было зрабіць, не змагаўся з былымі паплечнікамі, з Дзмітрыевым, з тымі, хто апанаваў сёння «Гавары праўду», - заявіў Уладзімір Някляеў. - Але што я, адзін чалавек, магу зрабіць супраць спецслужбаў? Я мог зрабіць толькі тое, што мог зрабіць - сысці».

Нагадаем, 19 снежня 2010 года Уладзімір Някляеў быў жорстка збіты спецназаўцамі і дастаўлены ў бальніцу хуткай медыцынскай дапамогі. Праз некалькі гадзін невядомыя ў цывільным выкралі палітыка з рэанімацыйнай палаты на вачах у ягонай жонкі. Ноччу 20 снежня, адразу пасля разгону масавай акцыі пратэсту супраць фальсіфікацыі вынікаў прэзідэнцкіх выбараў, БТ паказала інтэрв'ю Андрэя Дзмітрыева, які тады кіраваў перадвыбарным штабам Уладзіміра Някляева. Ён падзякаваў міліцыянтам за іх дзеянні ў час нападу і заявіў, што ў інцыдэнце былі вінаватыя самі дэманстранты.

Уладзімір Някляеў аб'явіў аб сваім сыходзе з пасады кіраўніка грамадзянскай кампаніі «Гавары праўду» і аб выхадзе з яе структур 8 красавіка 2015. Яго пост праз некаторы час заняў Андрэй Дзмітрыеў.