Міністр сувязі супраць таннага роўмінгу

У пытанні зніжэння коштаў міжнароднага роўмінгу неабходна знайсці залатую сярэдзіну.

Такое меркаванне ў гутарцы з карэспандэнтам БелТА выказаў міністр сувязі Сяргей Папкоў.

«Тут у нас пазіцыя неадназначная. З боку абанента - усё павінна быць танней і імкнуцца да нуля, з боку аператараў - трэба захаваць рэнтабельнасць, для таго, каб інвеставаць у далейшае развіццё тэхналогій.

Таму мы спрабуем развязаць пытанне, як зрабіць так, каб званок быў выгадны і аператару, і абаненту. Каб аператар не завышаў кошты на свае паслугі, у тым ліку пры выкарыстанні транзіту з адной краіны ў іншую.

Таму трэба знайсці залатую сярэдзіну. Пакуль у свеце з гэтай залатой сярэдзінай ўсё не зусім проста», - мяркуе Сяргей Папкоў.

Ён прывёў прыклад, калі абанент з Беларусі тэлефануе ў Расею, дзе ёсць такое паняцце як унутраны роўмінг:

«Там уся краіна падзеленая на 4 зоны. Іншымі словамі, калі тэлефанаваць, выкажам здагадку, з Масквы ва Уладзівасток, то званок праходзіць праз сеткі 4 аператараў. Хто аплаціць страты кожнага з аператараў, якія прапусцяць праз сябе трафік?»

Раней Еўразійская эканамічная камісія прапаноўвала скасаваць плату за роўмінг сотавых аператараў на тэрыторыі Еўразійскага эканамічнага саюза (ЕАЭС) пасля 2017 года. Згодна з планамі камісіі ў 2015 годзе адна хвіліна размоваў у роўмінгу не павінна каштаваць даражэй за 1,05 еўра. Для 2016 максімум устаноўлены ў 0,68 еўра, у 2017-м - 0,3 еўра за хвіліну.