Віцэ-міністр абароны Літвы: Цяпер не лепшы час скарачаць паветраную паліцыю NATO

Цяпер не лепшы час для скарачэння колькасці знішчальнікаў місіі супрацьпаветранай абароны (СПА) у краінах Балтыі.

Пра гэта заявіў віцэ-міністр абароны Літвы Марыюс Вялічка, паведамляе ru.DELFI.lt.

"Калі б спыталі маё меркаванне, то я думаю, што сёння не лепшы час для скарачэння, але гэта пастанова галоўнага камандзіра сіл NATO", - сказаў Вялічка.

Ён адзначыў, што асноўная місія паветранай паліцыі не слабее, а памяншаецца "элемент узмацнення".

Са слоў намесніка міністра, Літва сваю пазіцыю ў гэтым пытанні выкажа "ў пэўных фарматах, дзе будзе магчымасць", але не змог дэталізаваць, як на гэта адрэагуюць.

Ён дадаў, што Літва хацела б, каб "узмацненне паветранай паліцыі заставалася сёння значным, але не варта забываць і пра тое, што акрамя ўзмацнення паветранай паліцыі існуе і ўзмацненне наземных сіл, якое пад сцягам NATO дзейнічае сёння ў Літве".

Нагадаем, раней паведамлялася, што нягледзячы на павелічэнне актыўнасці расейскіх самалётаў, NATO мае намер удвая скараціць місію паветранай паліцыі ў Балтыйскім рэгіёне.