Дональд Туск: Самым важным пытаннем для ЕЗ з'яўляецца міграцыйны крызіс

Прэзідэнт Еўрапейскай Рады Дональд Туск назваў міграцыйны крызіс самым важным на сённяшні дзень пытаннем для Еўропы.

Такую заяву ён зрабіў у панядзелак пасля завяршэння сустрэчы з прэм'ер-міністрам Славеніі Міро Цэрарам (Miro Cerar) падчас візіту ў гэтую краіну, паведамляе УНІАН.

Са слоў Дональда Туска, менавіта тэма «далейшага міграцыйнага крызісу» была асноўным пытаннем перамоў. «Гэта - самае важнае на сённяшні дзень пытанне для Еўропы. Гэтае лета пацвердзіла, што міграцыя застаецца ключавым пытаннем для Еўропы найбліжэйшыя гады», - заявіў прэзідэнт ЕЗ.

Туск адзначыў, што ЕЗ нельга вінаваціць у міграцыйным крызісе.

«Мы павінны палегчыць невыносныя чалавечыя пакуты і трагедыі, якія цяпер у Еўропе сталі амаль штодзённымі навінамі. Карацей кажучы, Еўрапейскі Звяз павінен дапамагчы ў развязанні асноўных праблем, якія стаяць сёння перад еўрапейскімі краінамі», - падкрэсліў ён.

Туск паведаміў, што ў кастрычніку гэтае пытанне будзе прадметам абмеркавання Еўрапейскай Рады, а ў лістападзе ён будзе старшынстваваць на канферэнцыі ў Мальце, дзе еўрапейскія і афрыканскія лідары будуць спрабаваць знайсці практычнае развязанне гэтай агульнай праблемы.

«Толькі ўчора старшыня ў ЕЗ Люксембург склікаў пазачарговую сустрэчу міністраў юстыцыі і ўнутраных спраў. Сёння гэта можа быць найбольш актуальнай праблемай. Як мы бачылі ў Аўстрыі і ў Міжземным моры, гандаль людзьмі і незаконны ўвоз мігрантаў з'яўляюцца не толькі бруднай справай, гэта на самай справе з'яўляецца масавым забойствам. Сёння кантрабандысты з'яўляюцца патэнцыяльнымі масавымі забойцамі. Мы павінны зрабіць усё, што ад нас залежыць, каб гэта спыніць», - перакананы прэзідэнт ЕЗ.

Нагадаем, канцлерка Нямеччыны Ангела Мэркель раней заявіла, што 24 верасня Берлін плануе апублікаваць комплексны пакет захадаў развязання сітуацыі з мігрантамі. Мэркель заклікала іншыя краіны ЕЗ унесці ўклад у развязанне сітуацыі з шукальнікамі прытулку.