Парашэнка: Украіна павінна стаць непастаянным сябрам Рады бяспекі ААН

Украіна можа атрымаць статус непастаяннага сябра Рады бяспекі ААН ужо ў кастрычніку.

Такое чаканне выказаў прэзідэнт Украіны Пятро Парашэнка ў інтэрв'ю ўкраінскім тэлеканалам, якое выйшла ў эфір вечарам 26 верасня, піша "Інтэрфакс-Украіна".

"15 кастрычніка ў ААН у рамках Генасамблеі адбудзецца галасаванне за непастаяннага сябра Рады бяспекі ААН. Вы ўсё разумееце наколькі важна для нас цяпер ўвайсці ў склад Рады бяспекі ААН. Думаю, што нашы дыпламатычныя намаганні, мая праца ў гэтым кірунку прынясуць свой плён. І менш, чым праз месяц, мы атрымаем адпаведную пастанову", - сказаў Парашэнка.

Разам з тым, кажучы пра перспектывы рэфармавання Рады бяспекі ААН, прэзідэнт нагадаў, што Францыя выступіла з ініцыятывай абмежаваць права вета для пастаянных сябраў Рады бяспекі, "калі гаворка ідзе аб масавых забойствах людзей".

"Нават з маральнага пункту гледжання прымянення права вета ў такіх выпадках - гэта як ліцэнзія на забойства, і яно сёння сур'ёзна перашкаджае расследаванню або прымяненню ААН тых інструментаў і рычагоў, якія ёсць у распараджэнні", - адзначыў Парашэнка.

Пры гэтым ён выказаў задавальненне тым, што такая ініцыятыва ўжо атрымала падтрымку многіх краін сведчыць аб падтрымцы неабходнасці рэфармавання структур ААН.

Прэзідэнт Украіны таксама заявіў, што асноўнай задачай украінскіх дыпламатаў і яго асабіста падчас маючага адбыцца візіту ў Нью-Ёрк, на Генасамблею ААН, будзе ўмацаванне міжнароднай кааліцыі ў падтрымку Украіны, а таксама выкарыстанне ўсіх даступных спосабаў для таго, каб Расея выконвала ўзятыя на сябе абавязанні у рамках менскага працэсу.

"Мы павінны ўмацаваць міжнародную кааліцыю ў падтрымку Украіны. Гэта тое, у чым сёння Украіна мае патрэбу, як у паветры - трываласць кааліцыі, адзінства Свету і салідарнасць з Украінай", - заявіў Пятро Парашэнка.

У гэтым ключы Парашэнка адзначыў, што ў яго ўжо запланавана мноства сустрэч падчас візіту ўкраінскай дэлегацыі ў ЗША на Генасамблеі ААН.

Пётр Парашэнка падкрэсліў, што Украіна будзе выкарыстоўваць любую магчымасць і інструменты ўплыву на Расею з мэтай выканання ёю ўзятых на сябе абавязанняў у Менску.

"Калі Расея не будзе гэта рабіць (выконваць Менскія пагадненні - рэд.), то ў сусветнай супольнасці, у глабальнай кааліцыі ў падтрымку Украіны застаецца досыць рычагоў, каб вярнуць Расею за стол перамоваў і забяспечыць выкананне ўзятых на сябе абавязанняў", - падкрэсліў Парашэнка.

Прэзідэнт Украіны Пятро Парашэнка распавёў, што генеральны сакратар NATO Енс Столтэнбэрг падчас свайго візіту ў Кіеў запэўніў, што дзверы NATO для Украіны дагэтуль адкрытыя, паведамляе "Укрінформ".

"Было выразна заяўлена пра тое, што існуе пастанова бухарэсцкага саміту NATO ад 2008 года, і што гэтую пастанову ніхто не скасоўваў. Тычылася яна дзвюх краін - Украіны і Грузіі. Тады было выразна заяўлена - дзверы NATO для Украіны і Грузіі адкрытыя", - сказаў Парашэнка.

Прэзідэнт нагадаў, што праграма адносна асацыяцыі Украіны з ЕЗ цалкам супадае з планам дзеянняў для сяброўства ў NATO.

"Адзінае, што нам трэба рабіць - працаваць і змяняць краіну. Кожны на сваім месцы, таму што альтэрнатывы найбольш эфектыўнаму бяспечнаму аб'яднанню свету пакуль не існуе", - рэзюмаваў Пятро Парашэнка.