Кошты нафты зніжаюцца праз звесткі з ЗША

Апасенні глабальнай празмернасці нафты на рынку ўзмацніліся.

Сусветныя кошты нафты падчас гандлю чацвярга дэманструюць умерана адмоўную дынаміку на фоне статыстыкі тыднёвай змены запасаў «чорнага золата» ў ЗША, сведчаць звесткі таргоў.

Кошт кастрычніцкіх ф'ючэрсаў на паўночнаморскую сумесь Brent зніжаўся на 0,69% - да 50,30 даляра за барэль. Напярэдадні кошт нафты Brent узнімаўся вышэй 53 даляраў. На лёгкую нафту маркі WTI кошт зніжаўся - на 0,43%, дасягаючы значэння 46,05 даляра за барэль. У сераду стала вядома, што камерцыйныя запасы нафты ў ЗША (выключаючы стратэгічны рэзерв) за тыдзень, павялічыліся на 4,7 мільёны барэляў - да 455,4 мільёна, піша «Прайм».

Аналітыкі чакалі росту паказчыка на 0,032 мільёна барэляў, да 450,832 мільёна. Здабыча за тыдзень у краіне, паводле звестак міністэрства, апусцілася на 119 тысяч барэляў у дзень - да 9,218 мільёна барэляў. Пасля публікацыі гэтай статыстыкі асцярогі глабальнай празмернасці нафты на рынку ўзмацніліся.

«Умацаваны даляра, рост запасаў нафты ў ЗША і магчымае адабрэнне іранскай ядзернай угоды кангрэсам ЗША перашкаджаюць рынку аднавіцца, прынамсі цяпер», - заявіў аналітык Citi Futures Цім Эванс (Tim Evans) газеце The Wall Street Journal. Патанненне нафты апошнім часам экспэрты тлумачаць павышанай прапановай на рынку, якая ўзнікла дзякуючы амерыканскім вытворцам сланцавай нафты, якія аслабілі некалі моцныя пазіцыі краін-сябраў АПЕК на сусветным рынку нафты.

На думку аналітыкаў, рынак нафты чакае рэкордная за 30 гадоў празмернасць прапановы. Прапанова нафты перавышае попыт ужо паўтара года.