Швэцыя пераглядае свой нейтралітэт на фоне расейскай агрэсіі

Займаемая Швэцыяй цягам двухсот гадоў пазіцыя ваеннага нейтралітэту пахіснулася на фоне еўрапейскай інтэграцыі і пагрозаў з боку Расеі.

Гэтыя падзеі прымушаюць палітыкаў скандынаўскай краіны казаць аб уступленні ў NATO, паведамляе Инопресса.ру са спасылкай на Los Angeles Times.

Цягам апошніх двух гадоў вайскова-паветраныя і вайскова-марскія сілы Масквы ўзмацнілі патрулі ля межаў і ў межах паветранай прасторы і марскіх зон дзяржаў Прыбалтыкі на фоне таго, як дачыненні паміж Расеяй і Захадам зноў сталі варожымі, піша аўтар артыкула Кэрал Дж. Уільямс.

У артыкуле гаворыцца, што з таго часу, як Крэмль анэксаваў Крымскую паўвыспу ў сакавіку 2014 года, грамадскае меркаванне змянілася з агульнанароднай апазіцыі сяброўства Швэцыі ў NATO на адабрэнне ўступлення ў альянс, пра які на сацапытаннях цяпер кажа адзін швэд з трох.

"Пасля таго як швэдскія СМІ шырока асвятлілі рост настрояў на карысць NATO, расейскі амбасадар у Швэцыі Віктар Татарынцаў папярэдзіў аб тым, што Масква адрэагуе ваенным шляхам, калі Стакгольм адмовіцца ад нейтралітэту і ўступіць у альянс", - адзначае аўтар публікацыі.

"Пуцін адзначыў, што наступствы будуць, што Расеі прыйдзецца звярнуцца да адказу ваеннага характару і пераарыентаваць нашы войскі і ракеты. Краіна, якая ўступае ў NATO, павінна ведаць пра рызыкі, якім яна сябе падвяргае", - заявіў Татарынцаў у чэрвені ў інтэрв'ю газеце Dagens Nyheter.

Уільямс адзначае змены ў праграме апазіцыйных партый у Швэцыі на карысць ўступлення краіны ў альянс.

"Кіроўная кааліцыя сацыял-дэмакратаў і зялёных па-ранейшаму выступае супраць сяброўства ў NATO", - піша газета. Але яны падтрымалі больш цеснае ўзаемадзеянне з заходнім абаронным альянсам і далучыліся да чатырох іншых паўночных краін у красавіку, заявіўшы аб вайсковым супрацоўніцтве ў "непасрэдных адказных захадах супраць агрэсіўных паводзін Расеі".

"Гэты пакт аб'ядноўвае Швэцыю, Данію, Нарвегію, Ісландыю і Фінляндыю ў агульнай місіі для ўмацавання абароны супраць патэнцыйных пагроз з боку Расеі", - тлумачыць выданне.