Авіяцыя Расеі нанесла першы ўдар у Сірыі

Удар быў нанесены ля горада Хомса ў заходняй Сірыі.

Пра гэта паведамляе Reuters са спасылкай на афіцыйную амерыканскую крыніцу. Акрамя таго, высокапастаўленая афіцыйная крыніца паведаміла CNN, што расейскія самалёты праводзяць бамбаванне непадалёк ад горада Хомса.

На сайце Сірыйскага цэнтра ў выкананні правоў чалавека з'явілася паведамленне пра тое, што ў выніку бамбавання ўрадавых ВПС на поўначы правінцыі Хомс загінулі прынамсі 27 мірных жыхароў. Сярод ахвяр - пяць жанчын і шасцёра дзяцей. Некалькі чалавек атрымалі цяжкія раненні, піша NEWSru.com.

Варта адзначыць, што на мінулым тыдні крыніцы Сірыйскага цэнтра ў выкананні правоў чалавека, які знаходзіцца ў Лондане, паведамілі, што сірыйскія ўрадавыя войскі Башара Асада ўжылі нядаўна дастаўленыя ў краіну вайсковыя самалёты расейскай вытворчасці для нанясення ўдараў па размяшчэнню "Ісламскай дзяржавы" (экстрэмісцкая групоўка, забароненая ў РФ). Крэмль тады не адказаў, бамбілі расейскія самалёты пазіцыі ІД у Сірыі ці не.

Тым часам расейскія журналісты высветлілі, што адной з галоўных мэтаў бамбаванняў РФ з'яўляецца спыненне магчымасці пампавання нафты тэрарыстамі і далейшага кантрабанднага гандлю. Паводле звестак "Новай газеты", вайскоўцы ўжо кансультаваліся з нафтавікамі.

Прадстаўнікоў Мінабароны перш за ўсё цікавіла пытанне якія помпавыя станцыі, што забяспечваюць перапампоўванне нафты па трубаправодзе, неабходна вывесці са строю, каб спыніць магчымасць перапампоўвання нафты, а, такім чынам, кантрабандны гандаль сыравінай. Нафтавікі далі вычарпальныя адказы на пытанні, у тым ліку падаўшы і дакладныя каардынаты гэтых аб'ектаў нафтавай інфраструктуры, кантраляванай ІДІЛ.

Акрамя таго, заходнія СМІ прадаўжаюць гадаць пра тое, якую вышэйшую мэту ставіць перад сабой Пуцін на Блізкім Усходзе. Журналісты сумняваюцца, што прэзідэнту РФ важна захаванне рэжыму Башара Асада. "Уладзімір Пуцін паслаў сваіх жаўнераў у Сірыю не проста дзеля таго, каб праявіць салідарнасць з Башарам Асадам. І ляцелі яны на расейскія базы вакол Тартуса не дзеля таго, каб дапамагчы Асаду ўтрымацца ва ўладзе. Гэта зразумела без слоў. І Пуціна не трывожыць магчымасць страты адзінага порта ў цёплым Міжземным моры, які яшчэ застаўся ў руках Масквы", - піша Роберт Фіск у Independent.

На думку аўтара артыкула, пераклад якога публікуе InoPressa, Расея рыхтуе сірыйскае войска "да вызвалення ад ісламістаў старажытнарымскага горада Пальміра". "Новыя расейскія знішчальнікі-бамбавікі, новыя супрацьтанкавыя ракеты і нават, магчыма, новыя расейскія танкі T-90 рыхтуюць для выкарыстання ў пустыннай мясцовасці. Адна з самых сучасных сірыйскіх авіябаз знаходзіцца прыкладна ў 50 мілях ад Пальміры - на магістралі на ўсход ад Хомса, - і сірыйскае войска некалькі месяцаў планавала наступ вакол гэтага горада", - тлумачыць журналіст.