Францыя запатрабуе ад Volkswagen кампенсацыі дзяржсубсідый

Цяпер праводзіцца ацэнка сумы, якую ўлады Францыі будуць патрабаваць з Volkswagen.

Францыя мае намер запатрабаваць з аўтаканцэрна Volkswagen кампенсацыі дзяржаўных субсідый на набыццё аўтамабіляў, якія былі закранутыя скандалам з дэфектным праграмным забеспячэннем. Пра гэта заявіла міністарка экалогіі, устойлівага развіцця і энэргетыкі краіны Сегален Руаяль, піша РІА "Новости".

"Калі купля нібыта экалагічна чыстых транспартных сродкаў ажыццяўлялася з удзелам дзяржаўнай субсідыі, гэтая субсідыя павінна быць вернутая", - адзначыла яна.

Са слоў Руаяль, цяпер праводзіцца ацэнка сумы, якую ўлады Францыі будуць патрабаваць з вытворцы аўтамабіляў.

"Мы ведаем, што крыху менш за мільён аўтамабіляў канцэрна былі абсталяваныя няякасным праграмным забеспячэннем, і бонус за экалагічнасць не закрануў усіх іх. Гэта залежыць ад года выпуску. І па выніках ацэнкі мы выставім Volkswagen рахунак", - сказала Руаяль.

Сёння стала вядома, што дэфектнае праграмнае забеспячэнне ўстаноўленае ў агулам на 948 тысячах 064 аўтамабіляў аўтаканцэрна на тэрыторыі Францыі. Гаворка ідзе пра 574 тысячы 259 легкавых аўтамабіляў, выпушчаных пад маркай Volkswagen, а таксама аб 189 тысячах 322 Audi, 66 тысяч 572 Skoda і 93 тысячах 388 SEAT, а таксама аб 24 тысячах 523 грузавых аўтамабіляў Volkswagen.

Нагадаем, скандал усчаўся пасля таго, як амерыканскае Агенцтва абароны навакольнага асяроддзя (EPA) абвясціла, што Volkswagen усталёўваў на сваіх дызельных аўтамабілях праграмнае забеспячэнне, што заніжала паказчыкі выкіду шкодных рэчываў падчас праверак.

Паводле папярэдніх звестак, фальсіфікацыі закранулі 11 мільёнаў аўтамабіляў ва ўсім свеце. На фоне скандалу ў адстаўку падаў кіраўнік канцэрна Марцін Вінтэркорн, на змену яму прыйшоў кіраўнік кампаніі Porsche Матыяс Мюлер.