Памочнік Лукашэнкі прапануе скараціць адпачынак для догляду дзіцяці

Адпачынак па догляду за дзіцем можна скараціць да двух гадоў, мяркуе памочнік прэзідэнта ў эканамічных пытаннях Кірыл Руды.

«Цяпер адпачынак па догляду за дзіцем у Беларусі з'яўляецца адным з самых працяглых - 3 гады, у Расеі - 1,5 гады, у Казахстане - 1 год. Эфект ад працягласці водпуску па догляду за дзіцем неадназначны», - піша Кірыл Руды ў артыкуле, які апублікаваны ў апошнім выпуску «Беларускага эканамічнага часопіса», паведамляе БелаПАН.

«Большасць жанчын цягам 4-6 тыдняў аднаўляюцца пасля родаў, калі няма ўскладненняў. Таму многія еўрапейскія краіны гарантуюць аплачваемы адпачынак менавіта на гэты перыяд», - канстатуе Руды.

На ягоную думку, працяглы адпачынак па догляду за дзіцем мае шэраг мінусаў - адмоўна ўплывае на колькасць рабочай сілы, валавы ўнутраны прадукт, і стварае «дадатковыя стымулы да дыскрымінацыі на рынку працы». «Гэта перашкаджае назапашванню досведу і вядзе да больш нізкіх заробкаў для жанчын. Агулам, на прыкладзе АЭСР даведзена, што адпачынак па догляду дзіцяці да 1 года неабходны для паспяховага развіцця дзіцяці ды забяспечвае здароўе маці, а адпачынак звыш 2 гадоў не мае пэўных пераваг для здароўя і развіцця», - падкрэслівае Кірыл Руды.

Ён мяркуе, што апошнія звесткі паказваюць на аб'ектыўную магчымасць скараціць у Беларусі адпачынак па догляду за дзіцем на 1 год да 2 гадоў. «Па-першае, грудное гадаванне. Для груднога гадавання аптымальным з'яўляецца тэрмін адпачынку 2 гады. У Беларусі 19% дзяцей ва ўзросце да 6 месяцаў былі выключна на грудным гадаванні, а 41,4% - пераважна на грудным. У сярэднім па рэспубліцы прадаўжалі знаходзіцца на грудным гадаванні 27,9% дзяцей ва ўзросце 12-15 месяцаў і 11,5% ва ўзросце 20-23 месяцаў», - канстатуе Руды.

Паводле афіцыйных звестак, адзначае ён, 66,1% беларускіх дзяцей ва ўзросце да 6 месяцаў і 66,5% ва ўзросце да 23 месяцаў знаходзіліся на штучным гадаванні.

Яшчэ адзін фактар, які паказвае на карысць магчымасці скарачэння адпачынку па догляду за дзіцем, - гэта датэрміновы выхад жанчын на працу. «Для забеспячэння больш высокага даходу беларускія жанчыны часам датэрмінова выходзяць з адпачынку па догляду за дзіцем», - канстатуе Руды.

Ён звяртае ўвагу на тое, што калі ў сярэднім у апошнія гады ў Беларусі налічвалася блізу 110 тысяч родаў на год, то колькасць тых, што датэрмінова выйшлі з дэкрэтнага адпачынку - 14 тысяч (блізу 10-13%).

«Такім чынам, трохгадовы дэкрэтны адпачынак паўнавартасна выконвае сваю функцыю толькі ў першыя два гады. Дадатковы год з'яўляецца, хутчэй, вынікам недахопу дашкольнай інфраструктуры, звычкі, іншых прычын, наўпрост не звязаных з доглядам за дзіцем», - піша Кірыл Руды.

У той жа час, скарачэнне дэкрэтнага адпачынку на год можа забяспечыць рост эканомікі на 2,3%, адзначаецца ў артыкуле.

Нагадаем, што ў снежні 2015 экс-міністр працы ды сацыяльнай абароны Беларусі Антаніна Морава заявіла на міжнароднай канферэнцыі ў Менску аб тым, што «3-гадовы адпачынак па догляду за дзіцем - гэта марнатраўства».