Дварковіч: Беларусь аддасць пазыкі за газ да 20 кастрычніка

Пазыка Беларусі перад Расеяй за пастаўкі «блакітнага паліва» складае больш за 300 мільёнаў даляраў.

Беларусь да 20 кастрычніка выплаціць запазычанасць сумай, большай за 300 млн даляраў за газ, існыя аплаты будуць адбывацца своечасова, заявіў віцэ-прэм'ер РФ Аркадзь Дварковіч, піша interfax.by.

«У выніку перамоў мы выйшлі на фінальную версію дакумента, які мае на ўвазе некалькі асноўных дамоўленасцей, што дазваляюць урэгуляваць узніклыя праблемы. Першая - запазычанасць, якая ўзнікла ў аплатах за газ са студзеня гэтага года, будзе выплачаная напоўніцу да 20 кастрычніка гэтага года», - сказаў Дварковіч на нарадзе ў прэм'ер-міністра РФ Дзмітрыя Мядзведзева з віцэ-прэм'ерамі.

Ён растлумачыў, што запазычанасць складае больш за 300 млн даляраў.

«Існыя аплаты, прадугледжаныя кантрактам, будуць здзяйсняцца напоўніцу яшчэ раней, ужо фактычна на гэтым тыдні», - сказаў Дварковіч.

Мядзведзеў на гэта заўважыў: «Гэта значыць, нашы партнёры вернуцца да выканання кантрактаў і належным чынам будуць выплачваць кошт, прадугледжаны ў кантракце на падставе існай формулы».

Віцэ-прэм'ер таксама заўважыў, што з двух бакоў была пацверджаная гатоўнасць да далейшых перамоў аб будучых рамках супрацоўніцтва ў газавай сферы.

«Зыходзячы з таго, што ў дакументах Еўразійскага саюза ў нас пастаўленая агульная мэта - рух да агульнага рынку электраэнэргіі да сярэдзіны 2019 года і агульнага рынку газу да 2025 года, на гэтую тэму трэба правесці дэталёвыя перамовы, каб выйсці на дамоўленасці», - заявіў віцэ-прэм'ер.

З гэтай нагоды, адзначыў ён, адбудуцца яшчэ працяглыя дыскусіі.