Генерал-маёр Дзенісенка: Вучэнні дэсантнікаў пад Берасцем - адны з самых буйных

900 вайскоўцаў Беларусі і РФ адпрацоўваюць пад Берасцем знішчэнне незаконных фармаванняў.

18 кастрычніка пад Берасцем пачынаецца актыўная фаза беларуска-расейскіх вучэнняў 38-й асобнай гвардзейскай дэсантна-штурмавой брыгады з Берасця і байцоў 98-й гвардзейскай паветрана-дэсантнай дывізіі РФ (Кастрамская, Іванаўская, Яраслаўская вобласць). Пасля ўрачыстай цырымоніі адкрыцця вучэнняў у панядзелак вайскоўцы накіраваліся на пераадоленне воднай перашкоды. Запланавана дэсантаванне з гелікоптэраў і самалёта, у тым ліку начное, піша «Вечерний Брест».

17 кастрычніка на палігоне «Берасцейскі» была сабраная вялікая колькасць вайсковай тэхнікі і асабовага складу. Дэсантнікі з Расейскай Федэрацыі, якія прыбылі напярэдадні, разам з беларускімі калегамі размясціліся ў намётах. Пры тэмпературы блізкай да нулявой, кажуць, адчуваюць сябе нармальна. І праўда, у часовым жыллі, як пераканаліся журналісты, цёпла і ўтульна.

Сёлетнія вучэнні адны з самых буйных за апошні час.

- Спецыяльна пашыраная геаграфія ўдзелу расейцаў, - падкрэсліў у гутарцы з журналістамі камандзір Сіламі спецыяльных аперацый Узброеных Сіл Беларусі генерал-маёр Вадзім Дзенісенка. - Да таго ж, гэтыя вучэнні з'яўляецца завяршальным этапам сумеснай падрыхтоўкі з ПДВ Расейскай Федэрацыі. Мы паставілі мэту адпрацаваць сумесныя дзеянні для знішчэння незаконных узброеных фармаванняў менавіта змешанымі, сумеснымі падраздзяленнямі.

Са слоў камандзіра, адначасова з берасцейскімі праходзяць вайсковыя вучэнні ў Разані, дзе дакладна такія ж задачы адпрацоўваюць расейцы разам з беларусамі - 103-й асобнай гвардзейскай паветрана-дэсантнай брыгадай з Віцебска.