Белстат: Адбылося самае маштабнае за два гады падзенне даходаў

За апошнія 20 месяцаў у Беларусі зафіксаванае самае глыбокае падзенне грашовых даходаў насельніцтва.

Рэальныя наяўныя грашовыя даходы насельніцтва Беларусі (за вылікам падаткаў, збораў і ўзносаў з улікам інфляцыі) за студзень-жнівень 2016 года знізіліся на 7,1% у параўнанні з аналагічным леташнім паказчыкам, паведамляе БелаПАН са спасылкай на Белстат. Гэта самае глыбокае падзенне даходаў за апошнія 20 месяцаў.

Даходы насельніцтва падаюць з пачатку 2015 года: у студзені - на 1,4% у параўнанні з такім жа перыядам 2014 года; у студзені-лютым - на 2,3%; студзені-сакавіку - на 4%; студзені-красавіку - на 4,1%; студзені-траўні - на 4,7%; студзені-чэрвені - на 5,3%; студзені-ліпені - на 5,4%; студзені-жніўні - на 5,5%; студзені-верасні і студзені-кастрычніку - на 5,6%; студзені-лістападзе - на 5,5%; за год - на 5,9%. У студзені 2016 года зніжэнне склала 5,4% да студзеня 2015 года, у студзені-лютым - 6,4%, студзені-сакавіку - 6,5%, студзені-красавіку - 6,8%, у студзені-траўні, студзені- чэрвені і студзені-ліпені - 7%.

Паводле вынікаў васьмі месяцаў 2016 года ў агульным аб'ёме грашовых даходаў аплата працы займала 61,8%, даходы ад прадпрымальніцкай і іншай дзейнасці, якая прыносіць даход, - 8,3%, трансферты насельніцтву (пенсіі, дапамогі, стыпендыі і іншыя трансферты насельніцтву) - 23 , 9%, даходы ад уласнасці і іншыя даходы - 6%.

«У 2016-2020 гадах мяркуецца, што эканоміка будзе расці на лічаныя адсоткі. Ніякіх рэсурсаў, каб падвышаць даходы насельніцтва больш хуткімі тэмпамі, у дзяржавы сёння (у варунках значных выплат па ўнутраных і вонкавых пазыках) няма», - мяркуе дырэктар Даследчага цэнтра ІПМ Аляксандр Чубрык.